Simon Geron
En el Jewish News de esta semana, Rabbi Dr. Benjamin Elton prezentó un artikolo por Rosh Ashana i Yom Kipur. El dize:
“Muestras tradisiones mos ambezan ke la Torah nunka fue echa para los andjelos, sino ke fue dada a mozotros i para mozotros.”
Una implikasion es ke nada esta afuera de muestra posibilidad. La Torah aze demandas pezgadas, ma nada de lo ke demanda es demasiado para mozotros. Esto sinyifika ke, kuando viene el dezeo de azer una Mitsva o de tener un trokamiento de korason, mozotros podemos azerlo. No puede venir de la Torah la idea ke esto esta afuera de muestras fuersas.
Esta boz ke mos dize ke no podemos azerlo, o ke no vale la pena de provar porke no vamos a reushir, es la boz del “YETZER ARA”, la inklinasion mala ke mos deskoraja.
En Rosh Ashana i Yom Kipur semos demandados de remplasar el “No” kon optimizmo i konfiansa. Este es el mesaje del Shofar, ke mos dize ke podemos reushir.
Rosh Ashana es el momento de entrar en un anyo muevo kon la kavesa en alto, saviendo ke no ay limite a la altura espiritual i ke podemos alkansarla.
Todos tenemos una vida espiritual i munchos de mozotros tenemos el dezeo de kreser: kumplir mas Mitsvot, rogar kon mas profundidad i ambezar mas Torah. Ma munchos sienten ke les falta la kapasidad para azerlo.
A todo esto la Torah responde: “LO BASHAMAYIM HI” — “No esta en los sielos.”
Nada es imposivle: ni lo ke eskojemos, ni el poder de entrar en aksion.
Entonses, no devemos yamar una koza “imposivle” kuando, en realidad, es solamente muy dura. La tentasion de deklarar algo imposivle viene del echo ke esto mos libera de toda responsabilidad. En la Alaha pensamos ke semos “PATUR”, deskargados de muestras ovligasiones, en el momento ke kreemos ke estamos kondenados a ser vensidos.
El konsepto de lo imposivle es el enemigo de la difikultad, i no devemos desharlo ganar.
La istoria va adelantre grasias a personas ke refuzan de akseptar ke una koza es imposivle. Los ombres i las mujeres ke krearon la vieja komunita djudia en Australia, los ke vinieron de paizes muy leshos i los sobrevivientes de la Shoah ke konstruyeron de muevo sus vidas i sus famiyas despues de Bondi, son egzemplos ke mos ambezan ke estas kozas son posivles.
Lo ke tenemos de menester es kreer ke muestro dezeo puede ser realizado. Lo ke viene primero es muestra konfiansa i muestro dezeo.
De la Torah meldamos ke el Dio dio a Abraham i Sarah un ijo kuando ya estavan viejos. El Dio keria ke supieran ke kualkier koza era posivle.
La Aftara torna a esta lision al avlar de Hannah, ke no podia parir i ke konosia la istoria de Sarah i Isak. Este konosimiento le dio esperansa. Su marido le disho ke akseptara esta situasion, i Eli, el Kohen Gadol, se yerro i la akuzó de estar borracha. Eya no lo akseptó. Rogó, i eya tambien tuvo un ijo: el profeta Samuel.
No mos mankan problemes, i semos tentados de meterles la etiketa de “imposivle”, kuando en realidad son solamente muy duros.
Todos tenemos retos en Australia i en Israel, ma devemos kreer ke tenemos lideres aki i en Israel ke mos dan siguridad.
Ansi, en Rosh Ashana, vamos a refuzar al “impostor” konosido komo “Imposivle”, i vamos a tener el koraje de ver ke mizmo lo peor ke tenemos delantre de mozotros no es imposivle, sino solamente muy duro, i ke podemos venserlo.
HAGIM TOVIM-TIZKU LE SHANIM RABOT
