Simon Geron
En el Jewish News Rabbi Chaim Ingram prezentó un artikulo en la Parasha Roe ke dize, "No tengas el korason duro i avre tus manos. Dale a uno buen atitud i en retorno tu Dio te va bendizir en todo lo ke azes manualmente." Unos anyos antes estava eskrito en las gazetas de Sydney koza sovre los refujiados de Kosovo traidos a la Australia en la operasion "Safe Haven" dandoles abrigo i sokor en Singleton NSW. Fue dicho ke unos de los refujiados se keshavan del tratamiento substandard. Ke sus biviendas eran monotonas mankando fasilidades. Unos demandavan en los magazenes ke les den kozas debaldez i se ivan a rovar. Dizian ke eran Kosovares i ke no tenian ke pagar. Se puede dizir ke no eran rekonosientes. Ke seria mijor ke se tornen a donde vinieron. Era una istoria triste de todos puntos de vista mostrando el oposito de lo ke dize la Torah. "Dar i Akseptar en buen korazon". La Mitzva de Tzedaka es mas ke la mayoria de Mitzvot ke demanda de tener el atitud korekto. Una persona ke da a los proves sin kererlo mizmo si su donasion es 1000 piezas de oro, el piedre el merito de su Mitzva por razon de su konsiensia.
Ademas transgresa la prohibision "Ve lo yeira l'vaveha b'titeha lo" Ke tu korason no se sienta malo en dando". Ay una istoria remarkable en el Talmud. El savio Plimo ke resivio una vijita en Erev Yom Kipur del Satan degizado komo un mendigo i repulsivo insistio ke sea invitado a la meza. Plimo i su famiya lo akordaron. El mendigo se asento i se komporto de manera desgustante. Plimo le disho, "asentate de manera korrekta." Despues el mendigo demando una kupa de vino donde eskupio. Se puede dizir ke Plimo i su mujer estavan tentados de echarlo afuera. El mendigo se mostro komo uno al punto de tener un atako de korason, mismo si el era el Satan, Plimo tuvo piedad por el. La lesion es ke asta ke punto un duenyo tiene ke tratar a sus musafires. Del otro lado el musafir tambien deve komportarse bueno en la kaza del benefaktor. El no deve forsarse
sovre la famiya ni tomar mas de lo ke kaye a kada persona. Uno en nesesidad no deve ser averguensado de akseptar el ayudo de la persona ke le ofrese. Si no el sera visto komo un pekador. Mizmo en akseptando, no deve mostrar ke es su derecho. Pero si uno puede bivir sin Tzedaka, en difikultad mas vale ke lo aga en lugar de depender de los regalos de karne i sangre ke rogamos ke nunka sea nesesario. Vale mas komer en Shabat al lugar de un dia de semana al lugar de depender de otros. Mizmo si el estudio de la Torah kaye supremo, Rambam dize ke la Tora no se ambeza a la eksklusion del lavoro.
Ganar un revenido de Karidad desakra el nombre del Dio. Dezonora la Torah i mata el fuego de la luz de fe. Niega la vida al mundo a venir.
SALUDES A TODOS!
