Keridos Korelijionarios,
Este anyo selebramos el “Rosh Ashana” djuntos kon el “Shabat” devido a una buena koensidensia de nuestro kalendario donde espero i dezeo ke nuestros suetos de “Shabat Shalom” i “Shana Tova” arivaran djuntos a el sielo i seran akseptados por el Todo Poderozo.
Oy en este primer diya del nuevo anyo estamos prezentes delantre de El Dyo i rezamos dizyendo:
“Ze Ayom Tehilat Maaseha, Zikaron Leyom Rishon”
“Oy Es el Prensipyo de Tus Ovras, i Rekordo del Primer Diya”
Komo ya lo savemos bien “Rosh Ashana” no solo es una oportunidad de egzaminar nuestra konsensia sino ke es tambien el diya ke nos sintimos de estar prezente delantre del juisio divino.
En este diya suplikamos perdonansa de nuestro Kriador i rogamos ke otorge sanedad, prosperidad, pas i felisidad a nozotros i a toda la umanidad.
“Rosh Ashana” es un diya de refleksionar sovre nuestro pasado i es el punto de desidar el futuro de nuestra egzistensia todo en adorando a El Todo Potente.
Si la persona no es kapache de trokar su pasado, muy siguro ke ya es kapache de formar su futuro ke a mi opinion lo deve de azer. Tomar buenas konduktas i manyas, rezar kon senseridad, estudiar un poko mas la Santa Tora, komportarse kon buendad, ser mas pasiante i tener kudiado… pueden ser los empesijos de los grandes kambios por el futuro.
La Boz del “Shofar” ke sintimos estremesiendomos pienso ke no es solo un chuflo ordinario sino ke mos enspira este kambio mezo sus modeles de boz.
Keridos Ermanos,
El “Rosh Ashana” i el “Yom Kipur” kon el “Sukot”, “Shemini Atseret” i el “Simhat
Tora” ke lo sige, son los dias temerozos i las festividades ke mos gian al entendimiento de enforteser nuestros atadijos kon nuestra Santa Tora, nuestras tradisiones i nuestra kultura. Esto bien siguro ke nuestrros keridos ermanos profitaran de esta oportunidad.
Una kolektividad rezia i robusta es akeya ke bive en konfiensa mutuala i solidaridad. Akeya ke sige a konsiderar la ermandad i los atadijos a sus raizes. Nozotros semos los eredores de Tora, de kreensa, de kostumbres, de lealtad resiproka ke mos kedo de nuestros ansestros. No ay duda ke tenemos la responsabilidad de transmeter todo esto a la djenerasyon vinidera por siguro kon la luz de la saviduria kontamporanea. Esto no devemos de olvidarlo nunka.
Profitando de esta oportunidad kero agradeser i remesiar a los dirijentes de nuestra kolektividad empesando de los administradores sentral i a los diridjentes de nuestras fondasiones i intitusiones komo a todos los miembros ke en verdad so el testigo de sus abnegasiones todo en konsejandovos ke no mankesh de apuyarlos tanto ke puedesh.
Keridos Korelijionarios,
Me gustaria finalizar este mesaje kon nuestra rogativa tradisionala:
“Tahel Shana Uvirhotea/ Empese el Anyo Kon Sus Bendisiones”
todo en suetandovos una anyada de sanedad, repozo, pas i prosperidad kon todos djustos.
Şabat Şalom
Shana Tova Umetuka
Rav David SİVİ
Gran Rabino
