Shimon Geron de Sydney i Orijinario de Estambul 18/8/2026
Keridos amigos i amigas,
Komo un grande viajador tuve siempre en mi bolsa los pasaportes de la sivdadania ke tenia, los Chekes de viaje kon moneda likida de Dolares i Euros,viajando liviano kon vistimyentas de verano i de invierno. Resiviendo iskontos altos komo un empleado de la kompanyia aerea de la Qantas durante 38 anyos de lavoro ize mas de 150 viajes viendo kaji todos los paizes del mundo, munchas vezes akompanyado por mi mujer i 3 kriaturas. Para mi esta epoka de mi vida era la mijor ke tuve. Komo se dize en Inglez, "A good fortune does not last forever". El bien no dura por siempre i el mal tiene su fin" .
Al ser viejo vide ke no puedia azer lo ke azia antes i esto lo senti en mi korason. Si un tiempo puedia viajar de Sydney a Los Angeles por el fin de la semana, agora no puedo irme a la eskina de la kaleja ande bivo. No era kestion de envejeser i pedrer fuersas, aki venia tambien el kuesto de la vida suviendo i las kondisiones de vida trokando de dia en dia. Oy a unos mezes de la edad de 90, la bolsa de viaje esta vazia i veo ke mis pasaportes se ekspiraron.
No se si vale la pena de renovarlos al no pueder viajar mas? Del otro lado viendo el augmento del antisemitizmo en este paiz i en kaji todo el mundo realizo si tenemos ke kitar esta paiz ke devo tener a lo manko el Pasaporte Australiano en regla. Se dize aki ke los Judios no se sienten siguros en la Australia i ke ay munchos ke se van a Israel mizmo si esta en gerra. Un pasaporte kosta hoy kaji 500 Dolares por persona. No es esto echar la moneda al chop? Kisas no porke en nuestra istoria uvieron siempre kavzos ande tuvieron ke tomar las validjas i partir de manera inesperada. La Australia ke vide en 1961 no es la mizma en 2026. Atakan a los Judios aki. De un Paradizo judio se torno a un Ginnam kon rasas mikstas en jeneral viniendo de paizes ke eran enemigos de Israel i antisemites. Se metiron al lado de los ke detestan a los judios amargando nuestras vidas.
SALUDES A TODOS
