Tradusido por: Simon Geron
Mel Brooks: Un siglo de riza, hutspa i umor djudio
En el Jewish News de esta semana, Jessica Abelsohn prezentó un artikolo sovre Mel Brooks, ke durante un siglo entero izo riyir a la djente kon su hutspa i su sensibilidad djudia.
Nasido el 28 de junio de 1926 en Brooklyn kon el nombre de Melvin Kaminsky, Mel Brooks selebró sus 100 anyos. Era el mas chiko de kuatro ermanos en una famiya djudia entre el Mundo Viejo i el Mundo Muevo.
Su padre, Max Kaminsky, venia de Danzig, la sivdad ke oy se yama Gdańsk i se topa en Polonya. Su madre, Kitty Brookman, era una imigrante de Rusia, orijinaria de Kiev.
Max murió de tuberculosis kuando Mel tenia solamente dos anyos, deshando a Kitty sola kon kuatro kreaturas para kriarlas en Williamsburg.
Su chikez estuvo yena de yidishkeit. Brooks kresió vendiendo bevidas de leche i guevo (egg creams) i pasando los veranos en Camp Sussex, un kampo de vakansas en New Jersey destinado a kreaturas djudias de famiyas modestas.
En sus primeros anyos en los hoteles del Borscht Belt, empesó a azer komedia. A los 17 anyos sirvió en la Armada Americana durante la Segunda Gerra Mondial, inkluyendo la famosa Bataya del Bulge.
Despues de la gerra empesó a eskrivir para el program de television “Your Show of Shows” de Sid Caesar, lavorando al lado de figuras komo Carl Reiner, Neil Simon i Woody Allen.
Fue kon Carl Reiner ke kreó los skeches del “Ombre de 2000 Anyos”, una kreasion ke vino a ser un klasiko para jenerasiones enteras.
Una de las kestyones ke le demandavan al Ombre de 2000 Anyos era:
— ¿Kén era Jesus el Kristo?
I su repuesta era:
— Un mansevo flako.
De ayi vinieron una seria de grandes suksesos komo “The Producers”, ke le izo ganar un Premio de la Akademia.
Mas tadre vinieron “Blazing Saddles” i “Young Frankenstein” en 1974.
Despues sigieron otras produksiones famozas komo “Spaceballs”, “Robin Hood: Men in Tights” i “History of the World”.
Durante toda su kariera, su identidad djudia nunka fue un elemento segundario. Su komedia estava profundamente enraizada en la larga tradision del umor djudio, un umor ke durante siglos sirvió komo mekanizmo de sovrebivensia.
La idea era riyírse de las kozas espantozas, asta ke piedren su poder.
Una vez, avlando de la muerte de su padre, disho:
“Esto siguro ke mi komedia se baza sovre mis inyervios i mi ostilidad. Al kreser en Williamsburg, me vistí de komedia para evitar problemes.”
Este modo de ver el mundo se ekstendió asta el Olokosto.
Brooks transformó a Hitler en una figura ridikula, sin minimizar el orror del nazismo ni de la mitolojia fashista.
Era un akto de desafio profundamente djudio, una forma de resistencia ke iva mas aya de la simple komedia.
A los 100 anyos, Brooks esta ainda muy leshos de retirarse.
Partisipa en la preparasion de “Spaceballs: The New One”, ke se espera ke salga en 2027.
Una de sus frases mas famozas es:
“Es bueno ser el rey.”
I mozotros le dezeamos ke biva asta los dos mil anyos, komo su famozo Ombre de 2000 Anyos.
Kuando le demandan kualo es el sekreto de su londjevidad, responde simplemente:
“Bushko lo ke ay de komiko.”
I avlando de lo ke le gustaria ke fuera eskrito en su piedra tombal, dize:
“Yo fui Mel Brooks, uno de los mas komikos djudios chikos ke kaminaron sovre la Tierra.”
SALUDES A TODOS
