Tradusido por: Simon Geron
Keridos amigos i amigas,
En el Jewish News de esta semana, Gareth Narunsky prezentó un artikolo sovre los miembros de la flotiya ke akuzan a Israel de averlos maltratado. La embasada de Israel refuzó estas deklarasiones de los aktivistas. Eyos afirman ke fueron torturados i sometidos a abuzo seksual.
Algunos de una duzena de aktivistas australianos fueron al Parlamento en Canberra para kesharsen del maltrato ke resivieron.
“En realidad, estas akuzasiones no tienen fundamento i fueron echas komo una provokasion dentro de una kampanya kontra Israel”, deklaró la Embasada de Israel.
No fue prezentada ninguna evidensia verdadera para sostener estas akuzasiones.
Los partisipantes ke aparesieron en unas fotografias mostrando firidas, aparesieron en otras fotografias sin ningun danyo i en buen estado de salud.
Formavan parte de la kuarta flotiya de ajitadores, bien konosidos por sus relasiones kon grupos terroristas, sin aportar ningun benefisio real.
En lugar de kontribuir al apoyo umanitario, estavan kreando disturbios i entorpesiendo los esforsos para ayudar a los siviles.
Entretanto, los lideres djudios australianos se adjuntaron a la kondena del Ministro de Seguridad Nasional, Itamar Ben Gvir, despues de la publikasion de un video ande atakava a los aktivistas.
En el video se veia una fotografia de Ben Gvir kon la bandiera de Israel, deteniendo a los aktivistas de la flotiya i gritando:
“Welcome to Israel. We are in charge here.”
Los aktivistas eran forzados a echarsen al suelo kon las manos atadas.
El embasador Hillel Newman deklaró:
“No ay una grande diferensia entre Israel i Australia en esto, porke los lideres de Israel tambyen kondenaron a Ben Gvir. Esto es una verguensa i no reprezenta el modo de aktuar de Israel. Los detenidos no deven ser tratados de esta manera.”
Daniel Aghion, del Konsilyo Egzekutivo, deklaró ke nada puede ekskuzar el komportamiento de Ben Gvir.
“El echo ke este grupo se enredó en una aksion ilegal i provokativa, ke benefisia a Hamas, es la razon por la kual fueron detenidos. Ma esto no djustifika ke sean maltratados.”
Jeremy Leibler, de la Federasion Sionista Australiana, disho:
“Ben Gvir no reprezenta la sosiedad israeliana ni tampoko las ideas de la mayoria de sus sivdadanos.”
Mizmo kondenando a Ben Gvir, los djudios australianos defendieron el derecho de Israel de interseptar la flotiya, konsiderando esta aksion djustifikada i legal.
Segun eyos, la flotiya estava rompiendo el blokeyo.
La ultima flotiya no era una mision umanitaria, sino una trampa politika danjoroza i provokativa.
Estava ligada al grupo turko IHH, afiliado a Hamas, ke Israel konsidera una organizasion terrorista.
El direktor jenerál de la Asosiasion Djudia Australiana, Robert Gregory, kritikó a la Ministra de Asuntos Eksteriores, Suzy Wong, por sus kritikas a Israel mientras permanesia kayada sovre otras kestyones internasionales de mayor importansia.
Ben Gvir ya avia sido kondenado por diferentes partidos politikos, inkluyendo algunos de sus propios aliados de koalisyon.
Al lugar de augmentar la retorika en torno a insidentes aislados, ay una nesesidad de konsentrarse en un dialogo konstruktivo i de reparar las relasiones entre Israel i Australia.
Saludes a todos.
