Aldo SEVİ
En la eskola primaria uzávamos selebrar la noche de Lag La-Omer toda la klasa, endjuntos. La profesora organizava el fuego de kampo komo un viaje de klasa. Kada uno savía kualo trayer, i avían tres-kuatro parientes ke vinían komo miradores.
Un anyo, me parese en la tresera klasa, uvo un grev de profesores ke ya avía kontinuado por un mez, i el fuego komún se anuló.
Akel anyo no pude topar kon ken asender el fuego de kampo. Los dos o tres amigos buenos ke tenía en klasa se fueron kon sus parientes a pasar unos kuantos días afuera de la sivdad.
Arbá de "mued" desidí de azer un torno en el malé para ver si puedo topar ijikos de mi edad ke están arekojendo kozas de tavla para el fuego. Estava muy muy kaynte, un día de hamsín insuportavle. No avía muncha djente afuera. Ama vide un ijiko de mi klasa ke me demandó si kería ke izieramos el fuego endjuntos.
La verdad, no kije azerlo kon el. El era un olé hadash de la Rusía, i no tenía ni un amigo en klasa. Era godriko, muy fuerte i violente. Dava buena haftoná a todos ke lo provokavan. Yo era muy flako i delikado i no tenía dingunas relasiones kon el; ni buenas ni malas. Amá la idea de kedar solo en kaza akeya noche era mas difisil, i akseptí su propozisión. Bushkimos endjuntos tavla para kemar, i a la noche salí kon un kiló de patatas al kampo ande ya avían munchos grupos de ijikos i ijikas ke aprovavan a asender lumbres.
Mi muevo amigo ya estava ayá, i el savía komo azerlo. La lumbre ke asendió era la mas grande, i muy presto munchos ijikos vinieron a muestro fuego grande.
De akeya noche mos izimos muy buen amigos por munchos anyos. Grasias a el, dinguno en la eskola entera nunka se atrivió a maltratarme, i grasias a mi el se kalmó muncho i ayegó a tener notas buenas i también otros amigos
