Keridos Korelijionarios,
En estos dias ke nos estamos aserkando por fiestar el “Pesah” esto bien kontente de aderesarme a vozotros un otra vez i de prezentarvos mis mijores suetos.
“VAYOTSIENU ASHEM MIMITSRAYIM BEYAD HAZAKA UVIZROA NETUYA, UVMORA GADOL, UVOTOT UVMOFETIM.”
La fiesta de Pesah no solo ke nos akodra nuestra salvasyon del esklavaje de Ejipto, si no ke es tambien el fundamiento de la egzistensia de nuestra identidad en todo modo de senso. Lo ke enfortese este fundamiento es la senseridad entre nuestros ko-ermanos, la solidaridad resiproka i la voluntad de komportamiento komun. I en este modo, avansamos en nuestro kamino moral komunamente i no individualmente. “BIN’ARENU UVIZKENENU NELEH, BEVANENU UVIVNOTENU… NELEH KI HAG ASHEM LANU.”
Todos djuntos kon nuestros jovenes, nuestros aedados, nuestras famiyas i keridos, kaminamos i andamos komo un kuerpo i un korason en este kamino yeno de moralidad, ke nos alkansa al monte de Sinay kon objeto de sermos meresientes por obtener la santa Tora nuestra gia de vida. “EN LEHA BEN HORIN ELA MISHEOSEK BATORA.” Siendo ke la salidura del Ejipto forma nuestra identidad, siguro ke la Tora es el fundamiento de nuestra libertad espiritual. I lo ke enfortese todo esto no son los suksesos individual, si no ke es el atadijo fraternal entre los korasones. No ay dubyo ke i esto depende de posedar la union bazada sovre el amor de los sielos i la kerensya de ermandad.
I de este modo el Pesah ke kontiene los preseptos apropriados en si, es un periodo ke nos aserka a El Todo Poderozo, ke nos da la oportunidad de mostrar nuestra union i ke nos promete de konsolidar nuestra kerensya de ermandad. Ademas, Pesah es uno de los periodos los mas konvenivles para transmeter nuestra kultura relijioza i sosyala a nuestras nuevas jenerasiones ke les apresta de obtener su libertad moral i espiritual.
Es por esto ke en festivando el Pesah kon todos nuestros keridos de toda edad i toda situasion i sovre todo en avriendo anchamente nuestras puertas i nuestro “Seder de Pesah” a todos los ke tienen de menester, lo rebivimos en nuestra mente desde miles de anyos la salidura de Ayifto i lo renforsamos una otra vez. I en este modo arivamos a la oprtunidad de enfloreser i enforteser nuestra verdadera libertad en koegzistiendo, en renforsando nuestra kerensya mutual i apresiando resiprokamente nuestras valores komunas. Todo en estando yeno de estos sentimientos i pensamientos rogo de El Todo Poderozo a ke siempre vos akompanye todas las Berahot de La santa Tora i ke este Pesah seya el empesijo de pas, i kerensya entre todos nozotros, en nuestro paiz i en el mundo entero.
Pesah Kasher i Alegre
Rav David Sivi
Gran Rabino
