Tu Bishvat es el 15 del mez de Shevat. El anyo muevo de los arvoles... El empesijo de la primavera. Kada arvole es una bendisyon, para el paiz. Kon su ermozura adorna la tyerra i da solombra. Las raizes ke estan a las onduras de la tyerra, la salvan de la erozyon. Kada anyo selebramos esta fiesta kon toda la famiya endjuntos.
El 02.02.2026, fyestimos kon grande entuziasmo esta fyesta en el rabbinato kon el Hahambashi, Rav. David Sevi ke izo una avla apropriada a la fyesta, i todos los ke lavoran aya.
Despues de las orasyones, todo lo ke aviya en la meza se komyo kon alegriya. Kero remersyar al ke organizo este dia i a los ke ayudaron.
El seder konsiste de komer frutas muevas i de bever vino; para fyestar el anyo muevo, o para fyestar la ayegada proksima de la primavera.
Las mezas son yenas de frutas i produktos de la tyerra.
Trigo i produktos derivados.
Vino, igo, agranada, azituna, datile, uva, mansana, muez, banana, karota, melon i frutas sekas.
Despues ke se disho todas las berahas i se komyo todas las frutas, se toma un limon en la mano i en golyendolo se dize una beraha diferente.
Es en Tu-Bishvat ke el Dyo desido ke los arvoles seran fruktiferos, unos de eyos van a kreser, otros se van a sekar i se van a murir.
Egziste una uzansa vyeja ke indika a los padres de sembrar un sedro kuando nase un ijo, i un sipres en el nasimyento de una ija. I en la boda de estos mansevos, los ramos de estos arvoles van a ornar la sinagoga ande se van a kazar.
Esta fyesta afirma la relasyon ke egziste entre el puevlo djudyo i su tyerra. Ya savemos ke el puevlo ebreo fue orijinalamente agrikultor, i tiene un amor profonda por los arvoles. Estas selebrasyones mostran la importansa ke dan los djudyos a esta fyesta.
Kale demandar esta demanda:
Ke es tan sinyifikativo en los arvoles ke fyestamos sus anyos muevos?
La Tora dize: Deke la persona es un arvole de la tyerra?
Ke es la sinyifikasyon de esto: Mos puedemos ambezar de los arvoles kozas muy emportantes para muestra vida.
Los arvoles syempre tyenen una influensa pozitiva enriva de la atmosfera, del tyempo i del entorno. Eyos dan frutas, solombra, abrigo a las bestyas, dan oksijen a la tyerra, avizan la erozyon i dan umidita a la tyerra.
Tu Bishvat es la fyesta de la natura.
El arvole es el sembol de laVIDA i del SAVER.
La Tora es el orijin de la saveduria, de la konosensya, es el oksijen de los djudyos. Ma, la konosensya no tyene valor kuando es sola, kuando no es entornada de otras kozas. Kale tomar fuersas de las tradisyones ke son muestras raises, para pueder tener un futuro reushido.
El ombre es komparado a un arvole del kampo; porke kon sus kualitades syempre el se developa, i a la fin i el da frutas, ke son los ijos.
Kale kontinuar a selebrar todas las fyestas, para ke los mansevos se ambezen muestras tradisyones i ke lo realizen fina la fin.
Para kada anyo mijorado!
