No se el titolo ke devo de dar a mi artikolo de esta semana. Si va eskrivir sovre la gerra Amerikana/Israelyana i Iraniana reelmente no puedo topar un titolo. La semana pasada kon un grupo de 25 personas tuve la posibilidad de vijitar los kampos de Auschwitz i Auschwitz-Birkenau en Krakow; el kampo de Majdenak ke se topa entre Krakow i Varshova i pudimos ver syertas partes ande se topavan las paredes del Getto de Varshova. El Getto fue bombardeado por los Nazis en 1943 dospues de tres anyos de su fondasion; dospues de la revolta de los Djudios del Getto. Reelmente fue un evenimyento muy emportante en la vida de los Djudios. I los Nazis no fueron kapaches de kombatir esta djente yena de koraje. Suetava ke este modo de revoltas toparan vida en kada Getto. Ya se ke no era muy fasil. Ma kon el koraje de los abitantes no era muy fasil… Si me demandash kualo fue mi opinion sovre la Polonya? Reelmente fui influensado por lo ke vide. Vijiti solo una vez la Polonya /dos dias; para el Kongreso Evropeo Djudio en Krakow en 2005. Era un diya ande todas las kayes estavan yena de inyeve. I kreo ke no es la mizma koza de vijitar una sivdad o un payiz en el mez de Febrero i a la fin de Avril ande todo esta vedre… Dospues ke la Polonya tomo parte en la Unyon Evropea, empeso a resivir mas munchos turistos. Oy en diya esta resivyendo mas de vente milyones de turistos. I es un payiz de 38 milyones de almas. I el anyo pasado resivio mas de 20 milyones de turistos del estranjero… Reelmente es un payiz ke se deve de vijitar. Me ambezi ke Madame Curie era una lehliya. I se kazo kon un Fransez. El sinyor Pierre Curie. I devemos de saver ke es la sola mujer ke resivio dos premios de Nobel (en Kimika i en fizika). Reelmente no savia ke Nicolaus Copernic ke bivio verso la fin del 15en siglo era un Poloneze. Mizmo lo puedo dizir para Gabriel Fahrenheit ke topo el grado de Fahreneit. Puedeser ke no pensi kualo era su nasion. Ma agora ya se ke era Poloneze.
Es un plazer de vijitar una sivdad en la primavera kuando todo esta vedre i todos los arvoles son yenos de flores. Vijitar la Polonya kon sus sufriensas istorikas i kon sus ermozuras jeografikas i istorikas es muy interesante.
