Es la semana pasada ke el prezidente Trump disho a los Iranianos ke las 48 oras se estan eskapando. I esta vez es el jeneral Pakistaniano ke organizo sedutas en Islamabad ande van a diskutir los Amerikanos i los Iranianos. Es siguro ke no se entendyeron. Los Amerikanos kon sus kondisyones kijyeron ke los Iranianos acheten todo lo ke estan propozando. Los Iranianos no son muy fasil para tratar. Eyos son un payiz ke tyene un pasado bastante fuerte. I saven tratar los sujetos. No tyenen adjile komo el prezidente Trump. Diya de lunes deviya de empesar las sedutas de los Israelianos kon los Libaneses. Reelmente no estamos entendyendo los komportamientos de los payizes i de los ke reprezentan estos payises. Oy syertas naves kijeron pasar el Golf de Hormuz. Dinguna nave fue atakada, ma fue el empesijo de syertos dezakordos.
El mundo esta pasando una epoka bastante difisil; i esto mos da grande tristeza. Esperamos ke estos dirijentes se komporten mas komo benadam i ke el mundo tope repozo. No keremos merkar la benzina a un presyo loko. Noche de vyernes merki el diesel al presyo de 72 liras. Un diya antes el presyo era 86 liras. En un depo de benzina pagi 850 liras (20 dolares) manko.
La semana ke vyene me va irme 5 diyas a Polonya, a Varsova i a Krakow; va vijitar por la segunda vez Auschwitz. Era en el 2005 ke me fui por una seremoniya kuando era los 60 anyos de la liberasion. Esta vez es un viyaje organizado. Mi mujer ke keria azer el “March of Living” i por esto mos estamos indo a Polonya para azer un viyaje ande vamos a topar la posibilidad de ver todo lo ke es posivle. Ay anyos ke los Djudios del mundo estan organizando viyajes i tures para konoser este periodo preto del Djudaizmo. En este viyaje vamos a topar la posibilidad de vijitar el muzeo Djudio en Krakow i la sola sinagoga ke fonksyona en esta sivdad. Dospues ke vamos a vijitar el kampo Auschwitz i Birkenau mos vamos a ir a Majdenak, un otro kampo ande muestros korelijionarios fueron matados. Vamos a tener la posibilidad de vijitar el Getto de Varsovie. Espero ke vamos a estar kontentes de este viyaje istoriko.
