Ay semanas ke esto eskrivyendo kada semana sovre la gerra ke estamos bivyendo en el Medio Oriente. Mizmo si muestro payiz ke se topa djusto al lado del Iran no toma parte en esta gerra, estamos influensados por sus rezultados. Estamos merkando la benzina para la araba kada vez mas kara. Es oy ke el governo dyo karar de pujar la elektrisita i el gaz natural de ventisinko por syen. I todo va empesar a pujar. Las tomates, las kalavasas, las espinakas, las berendjenas i todas las frutas van a pujar porke se emplea traktores en los kampos, se emplea fertilizantes en los kampos para tener mas munchos zarzavates i frutas; i todas estas zarzavates i frutas son transportadas kon kamyones ke fonksyonan kon benzina.
Los Amerikanos entraron en las tierras Iranianas para pueder salvar el segundo ofisyer amerikano ke se topava en el avion. No se si reelmente reusheron. Porke kon las deklarasyones del prezidente Trump no savemos si reflekta o no la situasion. Es kapache de avlar el kontraryo una ora dospues. Kualo es el ultimatom de amanyana. Iran deve liberar el golfo de Hurmuz. I kualo va afitar si no liberan. Trump disho ke van a ver el ginnam. No van a tener elektrisita, no van a pueder emplear ni vender el petrol ke tyenen. Si realiza todo lo ke esta dizyendo, reelmente vamos a ver una situasion muy difisil.
Kon esta situasion bastante komplikada, kualo se pasa en Israel? Disheron ke se eskaparon las fuzes i bombas de los Iranianos, ma malorozamente dainda estan embiyando bombas a diferentes sivdades de Israel. No tyenen repozo. Mizmo la noche de Pesah lo pasaron un poko en la meza de Pesah, siertos en el “mamad” (kamaretas ke fueron echas en las kazas para ser protejados de las bombas i de todo modo de gazes), i siertos en el “miklat” (abrigo ke se topa debasho del apartamento i ke es muncho mas siguro ke el salon o la kamareta de la kaza). I vemos ke kada diya es la mizma koza. Esto ogurando ke esta situasion tope fin i todos ke bivan en pas. Todos los ke bivimos en esta rejion tenemos de menester de ser mas kalmos i mas repozados.
