Esta semana antes de Pesah estavamos siguros ke la gerra se iva kedarse. Ma malorozamente no fue este modo. El prezidente Trump yeno de ambisyon kere azer la gerra kon los Iranianos kuerpo a kuerpo. Reelmente va ser una gerra bastante problematiko. Ma mirando la situasion kreo ke va ser un problem muy emportante para los Amerikanos. Los Amerikanos i los Israelyanos pueden azer pas kon los Iranianos. Ma no es posivle de saver lo ke keren egzaktamente. Oy en diya es muy difisil de ver una gerra entre los Amerikanos i los Iranianos en una izla. Puedeser ke la mas grande partida de los soldados Iranianos pueden ser matados kon las armas Iranianas i sus armas.
El prezidente Trump de los Estados Unidos i el primer ministro Netanyahu Israelyano son yenos de ambisyon para atakar los Iranianos. Del empesijo no valorizaron los Iranianos, i les paresyo ke son komo los Palestinianos. Ma malorozamente no son este modo. Los Iranianos tyenen un pasado muy riko mizmo si el rejim troko en el 1998. Mizmo en la diplomasia es un payiz ke tyene una grande eksperiensya. Los Amerikanos (el prezidente Trump) kreo ke no saven komo deven de komportansen. Kuando van a atakar una izla, tyenen un grande riziko de pueder pedrer munchos soldados. Ya se save ke los Amerikanos no reusheron en las gerras. Atakaron i pyedreron kada vez. En el Vietnam, en el Afganistan i en Irak fue kada vez la mizma koza.
Espero ke esta gerra si se realiza, va ser un evenimyento muy emportante para todas las partes i espero ke muy poka djente van a ser tokadas por las armas.
Esta semana dospues ke vamos a fiestar la fiesta de Pesah kon mi ija, yerno i inyeta mos vamos a ir a Kapadokya. Reelmente un lugar muy ermozo i muy turistiko. Mi ija i su famiya es por la primera vez ke van a vijitar este lugar sin semejansa.
Espero ke va ser un viyaje muy agradavle.
Hag Pesah sameah
