Oy diya de alhad me fui a merkar benzina. Aviya serka de dos semanas ke no merkava. Pagi 100 dolares (4.200 liras turkas). Una desgrasia. Asta agora pagava lo mas muncho 3.200 o 3.300 liras turkas. Reelmente estava muy karo. Kada diya para ir al echo esto konduiziendo serka de syen kilometros. I kon los evenimyentos ke se realizaron noche de shabat, la situasion no se esta amijoreando. Los Israelianos i los Amerikanos estan echando bombas a todos los lugares kritikos de Iran; i eyos mizmo si dizen ke no tyenen bastantes armas, ke no tyenen bastantes fuzes balistikas para atakar. Ma de diya en diya estan empleando fuzes mas grandes i kon mas muncho poder para dar danyo. Dospues ke los Amerikanos i los Israelianos atakaron munchos lugares en Iran, esta vez dyeron karar de atakar Dimona; ke es el lugar el mas emportante para Israel, ande se topan las armas nukleeres. I dospues echo fuzes a Arad ande reusho azer grande danyo. I se avla ke uvo mas de 100 feridos. Es por la primera vez ke los Israelyanos tuvyeron tantos problemes. Si kontinuan a atakar, los Persyanos estan dizyendo ke van atakar todos los establesimyentos ke se topan en el Golf Arabo para desalisar la agua de la mar i para produizir agua para bever i emplear.
De otra vanda, los Iranianos echaron dos fuzes balistikos a la baza Ingleza, Diego Garda ke se topa a kuatromil kilometros de distansya. Esto esta muy danjerozo, porke vemos ke los Iranianos pueden atakar munchas sivdades de los payizes Evropeos. Kreo ke estamos en una situasion bastante komplikada. Muestro payiz esta muy atentivo i no kere ser parte de esta gerra. Mizmo si los Iranianos (no semos siguros) echaron tres fuzes a la Turkiya i estos fuzes fueron detenidos por los patriotes ke se topan en muestra payiz i ke son armas del NATO. Dizen ke estan provokando la Turkiya i el Azarbaydjan para ke agan parte kon los Amerikanos; i keren emplearlos para atakar el Iran kon una gerra soldado kontra soldado. I esto siguro ke la Turkiya no kere esto.
Ay unos kuantos mezes ke la enflasion estava mas basha, i teniamos esperansas para una mijor situasion. Ma kreo kon el presio del petrol i todo lo ke va segir esta desgrasia todos los presios van a pujar. Todo lo devemos de transportar de una parte del payiz a la otra parte. Mizmo en los kampos ande se kultiva todo modo de zarzavates i de frutas se emplean traktores ke lavoran kon kombusivle. I este todo va ser la razon de los presios altos.
Vos kero dizir Hag Pesah Sameah, i no kero mas eskrivir sovre esta gerra ke va ser la razon de los diyas venideros ke van a ser muy difisil para todos los payizes i para mozotros.
