Esto eskrivyendo este artikolo noche de alhad. I ay 9 diyas ke la gerra entre Israel - Los Estados Unidos kontra el Estado Persiano esta kontinuando. En primero el Prezidente Amerikano disho ke esto va turar 4 semanas. Ma los Amerikanos dyeron karar de embiyar el treser vapor de aviones a esta rejyon. El vapor va vinir en dos semanas; i kreo ke no va vinir para unos kuantos diyas! Estan avlando ke van a entrar al Iran. Ma esto va ser muy difisil para los Amerikanos i para Israel. No tyenen frontyeras, i komo van azer? El Iran es un payiz muy grande. Los Amerikanos kon los Israelyanos dyeron koraje a los Kurdes para ke ataken en Iran. Ma vemos ke mizmo los kurdes no keren azer la gerra en esta situasion.
Atakar i echar bombas no es muy difisil oy en diya. Ma kreo ke no es muy fasil de konservar la situasion. Los Iranianos ke tyenen fuzes balistikas estan atakando los payizes arabos del golf ande se topa bazas Amerikanas. A la fin dyeron karar de echar bombas o fuzes a las rafinerias de petrol. Esto va ser una dezgrasia no solo para estos payizes ma para todo el mundo. Se save ke a lo manko los vente por syen del petrol mondial pasa por el estrecho Hürmüz. Reelmente es un punto muy emportante para el trafiko maritimo del mundo. Ya savesh ke los Iranianos no estan dando permision a los tankeres ke pasen el estrecho de Hurmuz. Oy meldi ke la produksion de las arabas no va ser muy fasil en unos kuantos mezes. La Turkiya ke tyene problemes ekonomikos kon esta situasion estavan dizyendo ke va pueder kontinuar su produksion en las arabas. Este sektor es el mas emportante en la eksportasion de la Turkiya.
No avlimos de Israel. Ma malorozamente los Iranianos estan atakando Israel i la mas grande partida del payiz estan pasando sus tyempos en los abrigos o en las kamaretas ke no pueden ser atakadas. Mizmo oy en los enkontros de alhad, la Sinyora Perla Katan, Musafira del Diya se topava en una kamareta durante el program. Reelmente una situasion muy difisil para los Israelianos. Se avla ke mas de 100.000 Israelyanos se topan en otros payizes i estan azyendo esforsos para pueder tornar atras. Mizmo ay munchos Turkos ke se topan en Dubai o otros payizes i ke no estan puedyendo tornar a sus payizes.
Este no es un problem ke se va rezolver en poko tyempo. Ma kualo va ser el problem en el Mediio-Oriente? Reelmente no savemos.
