Es Shabat demanyana ke me telefonaron i me disheron ke todos los evenimyentos de muestra komunidad fueron anulados. No entendi la razon, porke tuve un problem kon mi televizyon i no funksyonava. Demandi de ke? I me disheron ke los Amerikanos kon los Israelyanos atakaron al Estado Persiano. Avri el kompyuter i topi un posto de televizyon ande estavan dando konosensya sovre el evenimyento. No pensi en el empesijo. Ma saviya ke diyas de djueves i viernes los Amerikanos dyeron avizos a todas las embashadas del medio oriente para ke las famiyas se separen del lugar ke estan.
Todo estava programado. Es en primero ke los Israelyanos i dospues los Amerikanos ke atakaron kon los aviyones i echaron todo modo de bombas a los eskopos determinados. Ya mos ambezimos ke los dos estados tyenen buen karar de espiones ke lavoran para eyos. Es en la televizyon ke estavan azyendo komentaryos sovre el Iran dizyendo ke si un estado tyene tanta djente ke lavora para sus enimigos no pueden reushir. I fue este modo. Atakaron un edifisio ande avia una seduta emportante. I el lider relijiozo, el Ayetollah Ali Hamaney kon su ija i inyeto se topava en el mizmo edifisio. I el fue matado. En la seduta se topavan el ministro de la defensa, Aziz Nasırzade; Muhammed Pakpur, el komandante de la Guardia de la Revolusion; Hüseyin Cebel Amelian, el prezidente de la organizasyon de inovasion i investigasion de la defensa; i su predesesor, Rıza Muzafferiniya; Muhammet Şirazi, Prezidente del Buro Militar del lider Ali Hamaney. I otras personas muy emportantes para la armada Iraniana. Ya saviyan ke una gerra puediya realizarse. Tres personas salyeron mas presto de la seduta. I estan pensando si uno de entre eyos es el espion. Ma malgrado esto realizaron esta seduta… I ay dos diyas ke los Iranianos estan echando bombas; i dospues los Amerikanos o los Israelyanos estan atakando kon los aviones. Ya savemos ke en Israel en un lugar serka de Tel Aviv serka de 40 apartamentos fueron derrokados kon las bombas Iranianas. Un syerto tyempo no ay repozo para los Israelyanos. Estamos avlando kon syertos amigos i paryentes i todo el diya estan suvyendo a kaza i abashando al abrigo.
Se konta ke dospues ke Hamaney fue matado, un espion tomo la fotografia del Ayetullah para embiyar al Primer Ministro Israeliano Netanyahu. I es Netanyahu ke deklaro la muerte del Ayetullah. Diya de alhad todo el diya paso kon las bombas, i las deklarasiones de las dos partes. Ya savemos ke los dos payizes son kontra el rejim del Iran.
Oy malorozamente me ambezi ke muestro amigo, eskrivano del Amaneser Izak Eskinazi, marido de Anna Eskinazi mos desho la buena vida. No kreyi en primero i telefoni a dos amigos para estar siguro i para pueder telefonar a Anna i eskrivir unos kuantos biervos en el grupo de whatsapp. Reelmente İzak era un ombre muy valorozo. Dospues ke era merkader, se izo gia. I kreo ke era uno de los mijores sovre el Djudezmo en Estanbol i en Turkia. Sus funerales se van a realisar diya de Martes en el simiteryo de Kilyos. Ke su alma repoze en Ganeden.
