En primero el Prezidente Trump dyo karar kontra el trafiko de la droga en Venezuela. Ma reelmente no entendimos si era para la droga o para el petrol del paiz. Se save ke la droga en Venezuela tyene una grande emportansa. Ma mi opinion es ke el Prezidente Amerikano izo todo esto para el petrol del paiz. Este petrol era muy emportante para la izla de Cuba. I dospues de este evenimyento el paiz de Cuba tyene grandes difikultades para tener petrol i mizmo elektrisidad. Mizmo la Rusia tuvo problemes kon el petrol venezuelyano. Agora todo el petrol del paiz es utilizado por los Estados Unidos o los paizes ke son serka de los Estados Unidos. Unas kuantas semanas dospues, esta vez vimos un atako kontra la mafia de droga en Meksiko. I el mas emportante patron de la droga fue matado por la polisia Meksikana. El kontinente Amerikano es muy emportante para la produksion de la Droga en el mundo. I todos los mansevos son entosegados kon el trafiko de la droga de las Amerikas. El Meksiko i la Venezuela son los paizes los mas emportantes. Ke no vos pareska ke la droga se topa solo aya. Vemos ke mizmo la Turkiya es un paiz muy emportante para el trafiko de la droga. I vemos i sintimos ke syenes de Barones biven en muestro paiz kon un grupo bastante ancho. Es los Amerikanos ke estan sigiendo kon todo modo de instrumentos elektronikos todo lo ke se esta realizando en el trafiko de la droga, i estan dando rensenyamientos a la polisia de estos paizes. Deke tanto de libertad en muestro paiz, en Turkiya? Komo no ay munchas penas en muestro paiz todos los karteles estan lavorando libremente.
Dospues ke la polisia Meksikana mato el Baron del Kartel, todos los militanes del Kartel empesaron a atakar. Kemaron otobuses i atakaron todo modo de edifisios. Disheron ke ay un akordo entre el governo i los karteles. I los karteles, i no tokan los oteles del paiz porke el turizmo es muy emportante para la ekonomia del paiz.
Vamos a ver lo ke va afitar en los diyas venideros.
