Una semana dospues esto pensando lo ke bivimos. Ya se ke el oro i la plata no pujaron bastante. Ma ya savemos ke todos los Amerikanos, los Rusos, los Ukranianos, los Iranianos, los Palestinianos mizmo los Israelianos se enfasiaron de esta situasion. I yo me enfasia de eskrivir kada semana sovre este sujeto.
Mi ija kon su marido i muestra inyeta Aria van a vinir a Estanbol los diyas de Pesah. Vamos a fiestar Pesah endjuntos. Me disho ke no toparon la posibilidad de vijitar la Kapadoce / Kapadokia. Ke pekado. Reelmente es un lugar ke deve de ser vijitado. Es una maraviya kon todo. Kon los tuneles, kon los balones kon los kualos se aze tornos, kon las kulas … Es reelmente un lugar eksepsional. Mos iremos. Ma ken mos va azer tornos en Kapadoce. Es 13 o 14 anyos antes kuando me fui kon los paryentes de los elevos de mi ijo reelmente teniyamos un gia muy savido. I pasimos unos kuantos diyas maraviyozos. I avri el gia de mi telefono i topi el gia ke tuvimos en akel viyaje. Un mez i medyo antes, oy le telefoni i me disho ke malorozamente tyene un otro tur en Anatolia; ma verso la tadre su mujer ke es i eya gia me bushko, i le di todos los detalios. Semos 5 personas kon mi inyeta. Konosemos el turko, el inglez i mizmo el italiano. (mi yerno, mi inyeta i mi ija). El otel ande mos vamos a kedar i el aeroporto de ande vamos a vinir. Amanyana mos va dar un program de lo ke puedemos azer en tres diyas. Espero ke les va plazer este viyaje. Semos orozos de tener un payiz bastante riko de punto de vista istoriko i turistiko. En dingun payiz es posivle de topar tantos lugares para pueder vijitar.
Ayer avlando kon un muevo amigo tuve la posibilidad de saver ke un ombre eskrivio un livriko para no dizir livro (39 pajinas) sovre los Djudios de Babaeski. Ya savia ke egzistiya una komunidad en Babaeski. Ma no me paresia tanta rika para eskrivir un livro sovre estas personas i estas famiyas. Ma este ombre fue kapache de eskrivir. Amanyana mi primer echo va ser de publikar este livriko en dos diferentes edisyones. El primer para mi biblioteka i el segundo para la biblioteka del Muzeo Djudio.
Kreo ke la semana ke vyene la politika va ser el sujeto prinsipal de mi artikolo.
