Es un diya de fin de semana en medyodia ke el Şalom organizo un pranso ande mas de 80 personas ke lavoran para el Şalom, el Şalom Dergi, el Amaneser eskrivyendo artikolos o lavorando para ke el Şalom sea publikado kada semana. Normalmente lo organizan serka la fin del anyo ma este anyo el primer diya de Hanuka bivimos en Sydney-Australia un atako kontra la festividad ke fue realizada por la fiesta de Hanuka. I por esta razon anularon el pranso ke estava determinado. Komo los ke lavoran por el Şalom no se estan arekojiendo komo antes, todos vinieron kon grande plazer.
Kreo ke deven de azer sedutas mas frekuente en el Şalom o en otros lugares porke la komunikasion se esta realizando este modo i no kon mesajes en el komputer.
Es diya de viernes ke los Iranianos kon los Amerikanos se toparon en Umman. I reusheron a avlar para syertas kondisiones. I Iran no kere gerrear kon los Amerikanos. I kreo ke vamos a bivir una epoka mas repozada. Reelmente no keremos un evenimyento kada semana. Si el Prezidente Trump no ve muevos suenyos, i si lavora solo por los Estados Unidos vamos, a estar mas orozos.
Kualo se pasa en el Medio Oriento. Dospues ke los Palestinianos dyeron atras el kadavro del dalkavo Israelyano, pasaron a la segunda etapa del Tratado de Pas. I avriyeron la puerta entre Gaza i el Ejipto, kada diya 150 personas pueden pasar de Gaza al Ejipto i 50 personas pueden tornar atras. Agora kreo es mas libero la distribusion de los ayudos a los ke biven en Gaza.
La semana pasada aviya munchos problemes kon el oro i la plata ma empesando de lunes i martes la valor empeso a pujar. I ay munchas personas ke toman mizmo kredis de la banka para merkar estos metales. Ke koraje i ke yerro. Porke si abasha muncho es el empesijo de syertas desgrasias.
Komo el empesijo de kada anyo todos los presios pujaron bastante en el Enero del 2026. Esperamos ke kon la politika ke tratan, vamos a bivir un 2026 kon mas mankas ajitasiones.
