Diya de alhad era la fiesta de Tubishvat. Ay anyos ke este fiesta se selebra en Yeldeğirmeni-Haydarpaşa en la Sinagoga de Hemdat Israel. I kada anyo la selebrasion se termina kon la plantasion de unos kuantos arvolikos. Ma kale saver ke no pudimos formar una shara…
Ay unos kuantos mezes ke todos keren merkar oro, plata, platinium i otros metales. I savemos ke solo la plata pujo mas de syen por syen en un mez.
Ma el dalkavo diya de la semana fue una dezilusion para los ke merkaron estos metales. El ons del oro abasho de 10% i el ons vale 4 mil 850 dolares.
Para la plata, la situasion esta mas trajik. La plata se amenguo de 30% i la valor abasho a 83 dolares. I esta valor era mas de 150 dolares. Reelmente una situasion muy trajiko…
La nave Amerikana esta en la mar Mediteranea i todo el mundo esta asperando lo ke va afitar.
En Israel no estan muy repozados porke si los Amerikanos atakan los Iranianos, los Iranianos van a atakar los Israelianos i no los Amerikanos.
La Turkiya kon su prezidente i su ministro de los echos estranjeros estan lavorando para rezolver este problem muy emportante de una manera diplomatika. Devemos de saver ke el ekilibro del mundo troko kompletamente. La diplomasia no egziste mas kon el prezidente Amerikano Trump. Kada demanyana se alevanta de una diferente vanda kon diferentes penserios. No savemos lo ke va pensar en dos semanas. Puedeser esta vez va kerer la “Tour Eifel” de Paris!
Vamos a topar repozo puedeser dospues de las eleksyones en los Estados Unidos en Novembre o tres anyos i medio dospues kon las muevas eleksyones.
Bivir i ver …
