Kreo ke ay mas de un mez ke esto eskriviendo artikolos sovre la politika mondial. No so yo el kapache. Son los ombres de politika de diferentes payizes ke dan kada semana una deklarasion ke okupa todas las gazetas i la media de las televisiones i no es muy difisil de eskrivir lo ke pensan i lo ke azen.
Esta semana los Persianos kontinuaron a las demonstrasiones i es diya de lunes ke vemos ke la situasion se kalmo. No savemos si es para bien o para mal. Dospues de las deklarasiones del presidente Trump los dirijentes prometyeron ke no van a enkolgar los ke izyeron demonstrasyones.
No se ken se espanto. O los dirijentes Persianos ke no kijieron la gerra kon los Amerikanos, o Trump ke no kijo la gerra antes de las eleksyones ke se van a realizar este anyo.
Es por la primera vez ke uno/una ke resivio el premio de Nobel, de Pas, dyo este premio para tener buenas relasyones. Maria Corina Machado ke estava en la opozision en Venezuela para tener buenas relasiones kon el Prezidente Trump tomo un randevu kon el i le trusho el premio de Nobel ke resivio kon la medalia. I el komo bovo lo tomo i estava muy kontente de resivir este premio. La organizasion de Nobel dyeron una deklarasion dizyendo ke los premios son solo para una persona i no se pueden dar a otro. Espero ke un diya Trump va resivir el Nobel halis.
Kada diya un otro haber. Agora se avla de Gronland i de las reaksyones de los payizes Evropeos.
Komo la China es el payiz ke marka el petrol de los Iranianos agora van a tener muevos problemes kon la duana Amerikana. I estan empesando a vender sus ropas al Kanada i los Amerikanos van a vijitar mas muncho el Kanada para pueder merkar ropas chinezas. Para kada koza ay un remedyo.
