Normalmente en el empesijo de un muevo anyo, o en las fiestas oguramos buenos diyas, pas en muestro payiz i pas en el mundo. Ma kreo ke estos dezeos no estan muy valivles. Porke no estamos topando repozo en este mundo. Kada diya tenemos un diridjente ke pasa una kriza, i krea un muevo konflikto. El prezidente Trump es la estreya de este movimyento. La semana pasada estava kon Venezuela; esta semana empeso a demandar Gronland de la Danimarka. Egzaminando la istoria de la izla de Gronland, mos ambezamos ke la izla fue la koloniya de los payizes Danimarka i Noruega en primero en los anyos 1721-1814. Es en el anyo 1953 kon la Konstitusion del payiz de Danimarka ke la izla fue nomada una partida de las tierras del payiz. Oy en diya solo 56.000 personas biven en esta izla. Ma es muy rika en las minas ke tyene. Es rika en las minas raras. I esto da gana al sinyor Trump. Si los Amerikanos no pyedreron sus konsensya en el mez de novembre en las eleksyones, Trump puede pedrer la majorita en las asembleas.
Vemos la reaksiyon de los payizes Evropeos; estan dando apoyo a Danimarka. I esto es muy emportante. Los Estados Unidos kontra un payiz del NATO. Malorozamente el mundo va trokar en poko tyempo i los payizes ke no gastavan paras para las armas komo la Alemanya i el Japon van a tener armadas bastante emportantes. No se si es para bien o para mal.
Esta semana el segundo evenimyento fue lo ke se pasa en İran. De vez en kuando vemos syertas demonstrasyones i manifestasiones de los ke son kontra el rejim de los mollas. En Turkiya vemos miliones de turistos ke vienen de Persia i dinguna mujer esta kon el fishu en la kavesa. Oy en diya ay syenmiles de personas ke estan kontra el rejim aktual. El ijo del Shah Pehlevi esta pronto para tomar el poder, ma kreo ke no es muy fasil. Empesando del 1979, el rejim reusho a estar en el poder; vamos a ver si es el empesijo del trokamyento en el payiz.
