Diya de shabat mos alevantimos, i mirando los haberes vimos ke los Amerikanos dirijados por el prezidente Trump dyeron karar de detener i dospues de azer fuir al prezidente de la Venezuela, Nicolas Maduro i su mujer. En primero los yevaron a una nave militar; i dospues kon un avion a Nueva York. Una dezgrasia. Oy en diya el problem el mas emportante en el mundo es ke en primero los dirijentes de los payizes no estan mas konsiderando los diplomates. La mas grande partida de los embasadores no son mas profesionales. Los prezidentes estan embiyando syertas personas ke no fonksyonan mas en el payiz. I esta djente estan aziendo munchos yerros i no estan preparando la buena situasion a los prezidentes. Este es un ofisio ke no se puede ambezar muy kolay. Ma komo en Turrkiya, mizmo en los Estados Unidos, los prezidentes estan embiyando syertas personas ke no reushen en este echo. I por Trump puedemos dizir ke se komporta komo un kovboy. I esta aziendo lo ke le agrada. Un diya dospues ke aresto el prezidente Maduro, dyo una deklarasion ke kere la izla de Grönland. Reelmente esta komo una kriatura. La mas grande partida de los Djudios estan muy kontentes del Prezidente Trump. Ma yo no penso de la mizma manera. Si el “derecho” no fonksyona djusto, no es muy fasil ke el mundo este en una buena situasion! Ya estamos vyendo esto mizmo en otros payizes. Ya devemos de organizar en primero la djustisia.
Antes ke los Estados Unidos dyo karar de apanyar el Prezidente de la Republika de Venezuela, metieron en medyo un alay de konosensya para provar ke el Estado de Venezuela esta organizando el trafiko de droga para dar danyo a los Estados Unidos i para todos los ke moran en los Estados Unidos. Dospues ke apanyaron a Maduro, el prezidente Trump troko de politika. Esta vez estuvo avlando ke el governo de Venezuela no esta valorizando bueno el petrol del payiz. Esta vez ize syertas bushkidades para ver si el petrol del Estado Venezueliano es reelmente muy emportante!
Dospues ke vide el tablo de las reservas de petrol en el mundo, me ambezi ke Venezuela es el payiz ke tyene lo mas muncho de rezervas de petrol en el mundo. Dos vezes mas ke el Kanada; sesh vezes mas ke los Estados Unidos; kuatro vezes mas ke la Rusia, tres vezes mas ke el Kuveyt i los Emirates Arabos. Reelmente es muy difisil de entender el estado del payiz, del payiz de Venezuela. Kualo izyeron estas paras???
Anyos antes el entereso de los bond de Venezuela eran muy altos. Ma malorozamente , este payiz ke deviya de ser muy riko, no pago estos bondes, ni sus interesos. I todos ke tyenen bondes Venezuelianos deven de ser muy kontentes. Ma ser kontentes no da las paras atras!!!
