Ay mezes ke estamos entre shishes. El prezidente Amerikano Trump reelmente fue muy kapache para no darmos repozo. Kada diya esta dando deklarasyones ke son una kontra otra.
I no es muy fasil de dar karar lo ke devemos azer.
Oy martes dyo karar de ayudar los vapores ke no tyenen dar i aver kon los Iranianos, i disho ke va embiyar un vapor de gerra para akompanyarlos. I los Iranianos disheron ke echaron 2 bombas a este vapor. Los Amerikanos disheron ke no es la verdad. Es por la primera vez ke vemos tantas deklarasyones, i no savemos si son djusto o no. Es verdad ke no eran deklarasyones ofisiales. En el empesijo le paresio al prezidente Trump ke van achetar todo lo ke kere. Ma no fue este modo; i ay mezes ke estan tratando. Iran esta embiyando 12 o 14 kondisyones i Trump no esta achetando.
Oy en diya el varil del petrol esta kostando mas de 110 dolares. Si kontinuan a pelearsen i no avren el golf de Hurmuz, va ser una dezgrasia para los payizes ke merkan el petrol komo la Turkiya. No se si no la razon es la gerra i el petrol karo, ma oy deklararon ke la enflasion del mez de Avril fue mas de 4%. Reelmente vamos a tener problemes emportantes kon la pujita de los presios.
Es muy enteresante ke kon estos presyos mizmo tenemos kada diya mas munchos turistos. Kreo ke les esta agradando oteles i komidas karas.
El ministro del turizmo esta dando informasiones sovre la populasion de los turistos i lo ke estan gastando. No esto entendyendo. Todo esta en favor de muestro payiz.
Kreo ke los aviones fonksyonan de Israel, i para Israel. Me ambezi ke los Israelianos no estan achetando Turkos ke no son Djudios mismo si tyenen pasaportos vedres. Pasaportes vedres se dan a los fonksyonaryos, a los profesores de las univerdidades i a los ke azen eksportasion.
Kon el muevo visa elektroniko estan demandando ke avle kon el responsavle del aeropuerto de Ben Gurion. I este modo estan dando karar.
Mizmo si es kazado kon uno/un Djudio/ Djudia…
Va eskapar mis biervos de muevo augurando PAS en el mundo entero.
