Haymi Behar
Un anyo se fue sin azer muncho bruido
No serro la puerta fuerte, no disho adio.
Solo se despidio, komo se van los dias kuando ya no ay luz.
El anyo muevo viene sin promesas grandes.
No mos promete mas rikeza, ni mas fasilidad.
Mos trae una kestyon sola:
Ke vamos a kitar, i ke vamos a guadrar.
En muestra vida ay muncha koza ke se amontona.
Palavras demasyadas, presas sin razon, dias ke pasan sin ser sentidos.
El anyo muevo mos da una okazion poka:
kedarmos un poko, i eskuchar.
Esperansa no es una koza ke se grita.
No es un plan grande ni una idea de muncho bruido.
Esperansa es una boz chika ke dize:
dainda ay tiempo
Tiempo para dizir una palavra buena.
Tiempo para meldar algo ke mos avia mankado.
Tiempo para akodrarmos ken semos, sin adjile.
Ke este anyo muevo no mos demande mas de lo ke puedemos dar.
Ke mos de la fuersa de guadrar lo esensial.
I ke no mos aga olvidar ke, aun en los dias kurtos,
una chika luz basta para empesar.
Ke sea kon salud, kon pasensia,
i kon esperansas ke no prometen muncho,
ma ke kedan.
