Ay mezes ke estavamos asperando la reunion del NU ke se realiza kada anyo en Nueva York en el mez de septiembre. Este anyo esta reunion era muy emportante porke mas de syen payizes achetaron la egzistensya de la Palestina. Dospues ke Israel kon su primer ministro Netanyahu esta kontinuando a atakar Gaza, en todo el mundo esta kreando una reaksyon kontra los israelyanos i los djudios, malorozamente. Mizmo en Gresia ande ay munchos turistos israelyanos en munchas izlas gregas estan atakando los israelyanos. I oy en diya no es muy makbul de avlar en ebreo en las kayes afuera de Israel. Es por la primera vez ke vemos esto.
Nueva York es la sivdad ande moran lo mas muncho de Djudios desparte de Israel. I en la opinion publika vemos ke 22 por syen de los sivdadinos estan kon los israelyanos; i los 66 por syen estan apoyando a los palestinianos. Reelmente un rezultado inkreivle.
Noche de jueves, avia una seduta en la Kaza Blanka kon los Turkos i los Amerikanos. Komo a Trump le plaze vender armas o aviones, antes de la seduta les disho ke kere vender los aviones Boeing a la Turkish Airlines. I achetaron. Es i por esto ke Trump alavo al prezidente Erdoğan i reusho a vender 225 Boeings a la Turkish Airlines.
Es kon esta seduta ke los Gregos van alkansar a avrir de muevo la Eskola Teolojika de Heybeli. Era una de las eskolas de grande importansia ande edukavan los papazes.
No se lo ke ganaron los Turkos. Ya savemos ke empesando del mez de noviembre vamos a tener la posibilidad de bever whiskis mas barato ke todo modo de raki porke Trump les demando un deskuento en los derechos de duana para diferentes artikolos: arabas, sigaros, bevyendas alkolikas i munchos otros produktos. I todo esto fue achetado por los responsavles turkos.
Es un diya dospues ke Netanyahu, primer ministro vino a Nueva York sin pasar por un payiz Evropeo, pasando por la mar kon su avion. I vimos todo modo de protestos kontra Israel. Kuando empeso a avlar en la seduta de las Nasiones Unidos la mas grande partida de los reprezentantes abandonaron la seduta; i fue ovligado de avlar a las siyas vazias. En mizmo tyempo Netanyahu dyo orden de instalar oparlores en syertos puntos de Gaza para ke los militanes, el puevlo de Gaza i los rehenes oygan lo ke se esta avlando en Nueva York.
No entendemos lo ke afita dospues de la avla de los prezidentes. No savemos si es bueno o negro.
Esperamos ke lo mas muncho de estos problemes sean rezolvados asta la proksima seduta.
