Muy Keridos Korrelijionarios,
En este anyo ke estamos sigun nuestro kalendaryo a la entrada kon salud i prosperidad, tanbien estamos entrando a un periodo bien kargado de orasiones. Dospues del periodo “Rosh Ashana” i “Yom Kipur” ke son oportunidades solemnes de kontaktar kon El Todo Poderozo i mejorar nuestra kondukta verso los preseptos de nuestra fe, festivamos kon el “Sukot”, “Shemini Hag Atseret” i “Simhat Tora” kuando praktikamos kon estas festividades una otra vez nuestra kultura akumulada dizde kuarenta siglos.
En este periodo ke nozotros jeneralizamos komo “Festividades de Tishri” va ser una Onor i una alegriya para mi de pueder adjuntarme kon vozotros dentro las sinagogas i partajar nuestras orasiones i fiestas komunamente,
“Ufanita El Tefilat Avdeha Veel Tehinato Ad. Eloay
Lishmoa El Arina Veel Atefila Asher Avdeha Mitpalel Lefaneha Ayom”
“Mira Tu a la Orasyon de tu Siervo i a su Rogativa A. Dyo Miyo. Para Oir la Eksklamasyon i la Orasyon ke tu Siervo Aze Oy delantre de ti.”
Penso de devemos ser seguros ke nuestras rogativas alkansaran a El Todo Poderozo konforme a esta suplikasion de Shelomo Ameleh.
Espero i Sueto ke todos nuestros ermanos se akodraran de esta yamada miya. Dospues de kompletarse este periodo siendomos todos nozotros despreokupados i yenos de esperansa al futuro, suetamos por el mundo entero i por la patria pas, prosperidad, djustisia i el ayudo del Todo Poderozo todo en augurando “Gmar Hatima Tova” komo semos akostumbrados en kada prensipyo de anyo.
Keridos Ermanos,
Todo en rengrasiando i agradesyendo - si me permetesh i a vuestro nombre - a los dirijentes de nuestra kolektividad ke munchas vezes fui el testigo okular de sus abnegasiones i ke meresen nuestro apoyo en todo modo de senso, les auguro munchos anyos djuntos kon sus famiyas i sus keridos. Viniendo a vozotros mis keridos ermanos, esperando de estar en mas serka relasiones vos abraso a kada uno kon muncha karidad, i vos bendigo kon todas las bendisiones de nuestra Santa Tora.
Anyada Buena,
Tizku Leşanim Rabot
Rav David SEVİ
Gran Rabino
