Alp Etensel
Esta kestion me vino al tino, komo una persona puede ambezarse el Ladino sin tomar lisyon? Kuando yo me estava ambezando (ainda i syempre) el Ladino, yo avia meldado dos livros i eyos me avian ayudado muncho. Estos livros son muy simples i kurtos. El primer livro es “Beginner’s Ladino” por Alla Markova. Este livro no es muy profundo, porke no tyene los konjugasyones del kondisyonal o subjonktivo ama para empesar es muy ideal. El segundo livro se yama “Kurso de Djudeo-Espanyol para Prinsipiantes” por Matilda Koen Sarano, ke su alma repoze en Gan Eden. Este livro es mas profundo de el de Alla Markova.
Lo ke me plaze en este livro es ke ay munchas komparasyones entre el Ladino i el Espanyol Moderno. Ansina uno puede ver komo era el Espanyol Medieval en akeya epoka. (Komo el Ladino tomo baza del Espanyol Medieval)
Tambyen en este livro ay unas kuantas kantikas, ke yo avia topado muy entretenidas.
Ama seguro ke solo kon livros no es kolay de ambezarse una lingua, porke una lingua sinyifika “avlar”. Sin avlar i azer diskusyones es imposivle de ser un avlante nativo. Por esto la mijor manera de ambezarse es kon ir a una lisyon interaktiva. Ama malorozamente en Turkia no ay una instutisyon ke ensenya el Ladino. Dirijamos tambyen la palavra a Ulus Musevi Lisesi, la unika institusyon en Turkia ke ofrese edukasyon djudiya, i digamos ke esperamos ke presto empesen a ensenyar el Ladino, la lingua muestra.
HIPPOCRENE BEGINNER'S SERIES
BEGINNER'S
Ladino
WITH 2 AUDIO CDs
Alla Markova
HIPPOCRENE BOOKS, INC.
New York
