Instituto Salti para los Estudios del Ladino, Universidad Bar-Ilan, Israel, 14–16 de djulio de 2026 Yamada a prezentasiones (Call for Papers)
El Kongreso del Ladino i Estudios Sefaradis es un forum akademiko internasional dedikado al estudio de la lingua, la literatura, la istoria i la kultura del ladino (djudeo-espanyol, djudyo, djudezmo). Inogurado en Leeds en 1979, el Kongreso selebrara su XXII edision en el Instituto Salti para los Estudios del Ladino de la Universidad Bar-Ilan (Israel), del 14 al 16 de djulio de 2026.
Se invita a investigadores, inkluyendo a estudiantes de master i doktorado, a prezentar rezumenes de prezentasiones orijinalas i ineditas (20 minutos de durasion) sovre la lingua, la literatura, la istoria i la kultura de los sefaradim despues de la Ekspulsion de 1492, dezde diversas perspektivas disiplinarias i interdisiplinarias. Las linguas ofisialas del Kongreso son inglez, espanyol i ladino.
Reglas de Prezentasion: Los rezumenes (fina 250 palavras), una breve nota biografika (fina 200 palavras) i entre 3 i 5 palavras-klave, se embiyaran en un solo dokumento Word a [email protected] antes del 22 de febrero de 2026. En el sujeto del email se roga indikar “Kongreso” i la alkunya. Kale inkluir en los rezumenes el titulo de la prezentasion, nombre del autor/a, afiliasion i situasion akademika, lingua de la prezentasion i datos de kontakto. Kale ke los estudiantes de master/doktorado indiken el nombre de su direktor/a de tezis. Las notifikasiones de akseptasion van a ser embiyadas fina el 15 de marso de 2026.
Inskripsion i bursas de viaje: El pagamieto de la inskripsion de 100 USD, se pagara despues de la notifikasion de akseptasion. Se propoza fina sinko bursas de viaje para estudiantes de master/doktorado, de 200 USD kada una. Dichos estudiantes sin otras fuentes de finansiamiento pueden demandar este ayudo adjustando un breve teksto de eksplikasion a su email. La informasion sovre oteles serka de la universidad va a ser komunikada a su tiempo.
Sitio del Kongreso: La Universidad Bar-Ilan (BIU), la segunda universidad mas grande de Israel, se topa en Ramat Gan, a unos 10 km de Tel Aviv, kon akseso fasil dezde el Aeropuerto Internasional Ben-Gurion. El Kongreso tendra lugar en el Instituto Salti para los Estudios del Ladino, ke poseda una biblioteka espesializada kon mas de 3,000 volumenes dedikados a la lingua i la kultura djudeo-espanyola, ansi komo una importante koleksion de livros raros, manuskritos i djornales en ladino. Los partisipantes interesados en azer una estansia de investigasion antes o despues del Kongreso pueden metersen en kontakto kon la organizasion del Kongreso.
Komité Sientifiko: Prof. Ora Schwarzwald; Prof. Shmuel Refael; Dr. Dov Cohen; Dra. Ilil Baum.
Koordinasion del Kongreso: Dra. Ilil Baum [email protected].
