Desde los anyos de la fin del siglo 19, los sivdadinos djudiós ke bivían en las tierras del Imperio Otomano empesaron a deshar el imperio por munchas razones, en primero por las malas kondisyones ekonomikas ke se fueron agravando. Entre estas razones se puede kontar tambien el dezeo de evitar el servisio militar sin limites de tiempo.
La parte mas edukada de la populasyon djudía otomana, en partikular los ke avían estudiado en las eskolas de la Alliance i konosían bien la lingua franseza, emigraron en mayoriya a Fransia i a otros paízes de lingua franseza. Ma los djudiós otomanos ke avían resivido manka edukasyon, prefirieron paízes komo la Arjentina, el Uruguay i en parte el Brazil, onde no ivan a tener difikultades de lingua. En estos paízes pudieron kontinuar a usar sin problemes, en kaza i en la vida komunitaria, el Djudeo-Espanyol (Ladino).
En los mezes pasados, el Konsol Adjunto de la Arjentina en Estambol vino a vijitar muestro Muzeo. Durante esta vijita se avryo la kestyon de ke tipo de aktividád kulturala se podría organizar para refletar la memoria istorika komun entre los dos paízes.
Avlando de una eksperiensia personal: durante una vijita ke izé antes a Seattle, tuve la okazión de ver, aunke solo en parte, el archivo muy riko, de verdad muy riko, ke fue donado a un sentro de la Universidad de Washington por munchas famiyas de djudiós otomanos, en su mayoria emigrados de la Izla de Mármara i de Tekirdag (Rodosto).
Aki se pueden demandar unas kestyonés importantes:
Egziste en la Arjentina un sentro onde los djudiós emigrados del Imperio Otomano ayan donado fotografias i todo tipo de objetos de memoria, relijiozos o siviles? No tenemos una repuesta klaramente konosida. Ma, kon la kontribusyon de las famiyas de los emigrantes, pensamos ke es posible yegar a una etapa ke permitiria organizar una egzibisión ke muestre esta memoria.
Kon este eskrito, muestro objetivo es de kompartir este sujeto kon vozotros i de enrikeser, lo mas ke se pueda, una eventuala egzibisión. En este sentido, vos rogamos de informarmos sovre personas, famiyas o institusiones ke pudieran ayudarmos en este kamino.
Vos damos munchas grasias desde agora.
Los ke keren dar informasiones pueden yamar al numero +90 212 292 62 33 i avlar kon la Senyora Nisya.
