A lo manko kada mez estamos aziendo esforsos para realizar un tur turistiko empesando de Balat i inkluyendo las dos sinagogas de Ahrida i Yanbol. Asta este anyo todos estavan enteresados en la sinagoga de Ahrida. Dospues ke la Sinagoga de Yanbol fue restorada, reelmente se izo la perla de Balat i todos, si saven, estan aziendo esforsos para pueder vijitar la sinagoga de Yanbol. Kreo ke ya vos konti, se formo un salon de artikolos de ekspozision para los vijitadores ke vienen a Balat. Balat, uno de los kuarteres rikos tyene toda la rikeza de 20 sinagogas ke fueron avyertas anyos enteros. I todos los ke estan vijitando estan muy kontentes de ver esta rikeza de los Djudios Balatlis. Mizmo oy, diya de alhad dospues de midi envitaron mas de 200 personas, los vizinos de la maalle. Antes era muy koryente de envitar los komshus de la maalle; ma dospues mos izimos frankos i tenemos mas pokas relasiones kon los vizinos. Dospues ke trokaron la manera de las relasiones, esta vez envitaron los vizinos para asender las 8 kandelas de la Hanukiya. Devemos de felisitar los dirijentes de las sinagogas de Balat. Devemos de rengrasiar Moris Levi ke fue prezidente durante unos kuantos anyos i oguramos reushitad buena al muevo prezidente.
En el tur de Balat i Galata ke fue realizado oy, el grupo dospues paso en frente de Balat a Kasımpaşa. Kuando izyeron un tur en Galata i komyeron por midi, el grupo se arekojo en frente de la Kula de Galata i a estas oras un grupo de 10 a 12 personas avriyeron las bandyeras palestinianas i protestaron muestra gia kon su nombre kreo porke eskrivyo unas kuantas palavras por los soldados del IDF. I empesaron a protestar dizyendo ke es siyonista. Un diya antes, la polisiya mos bushko i disho ke van a embiyar dos polises a kada grupo i embiyaron. El evenimyento topo fin kon la intervension de la polisia; el grupo vino al Muzeo i no vijito el Orno de Matsa ke no fonksyona mas. Dospues uvo syertas deklarasyones en diferentes lugares, ma es Emy, muestra gia ke fue muy firida. Vamos a pensar si devemos dar keshas al djuzgo. Vamos a avlar kon muestro avokato ke es kargado de estos echos. Ya se save ke dingun atako se realizo kontra el grupo. Keremos rengrasiar la polisia ke se okupo del empesijo asta la fin por el evenimyento realizado.
