Noche de Alhad era la primera noche de Hanuka. I komo todas las fiestas se fiesta en primero en Australia i la Nueva Zelanda. Malorozamente este anyo serka de Sydney, en la Plaj Bondi organizaron una aktivitad para fiestar la primera noche de la Fiesta de Hanuka. I el nombre era “Hanukah by the sea”. Dos teroristos kon sus armas mataron a lo manko 15 personas. I avia mas de 40 feridos.
Un ombre korajozo, en primero disheron ke era muzulmano, dospues entendyeron ke era maroni, aferro a uno de los teroristos i reusho a tomar su arma. En una plaj, reelmente una gerra para kedar en vida. Kuando esto eskriviendo mi artikolo, el evenimyento era bastante muevo i no savemos kualo fue la fin.
Puedemos dizir ke dospues de los evenimyentos ke se realizaron en Israel i Gaza, el antisemitizmo i el anti-israelismo pujo en el mundo entero. I oy en diya vemos un antisemitizmo en el mundo entero.
No es solo en Australia ke vimos atakes teroristos . En la Olanda organizaron manifestasiones kontra los Djudios i la fiesta de Hanuka.
No se si tenemos el derecho de kritikar los Israelyanos i sus dirijentes. Kon sus aksyones el Governo Israelyano dyo grande danyo a la aparensya del israelyano. En enverano por la primera vez vimos en las izlas Gregas la reaksyon de los Gregos kontra los Israelianos. Antes el pasaporto israeliano tenia una grande valor.
En muestra komunidad el konsierto ke se devia de realizar noche de alhad va ser realizada la semana ke viene. Kreo ke en todo el mundo Djudio las aktivitades muzikalas no se van a realizar. Dospues del primer diya, espero ke vamos a terminar esta fiesta en pas.
Malorozamente empesando de los Estados Unidos, en munchos payizes es libero de tener una arma. Esto da koraje al ke kere matar Djudios o otras personas. Para no ver mas terorizmo kreo ke kale defender en primero la vendida de armas.
Auguro pas al mundo entero.
