Komo eskrivi un artikolo para el Amaneser sovre la Seremoniya de Bendision del muevo Hahambashi Sevi, no va eskrivir sovre este sujeto. Auguro una reushitad al muestro Hahambashi David Sevi.
Dospues de la seremoniya entre las kartpostales ke arekojo avia una foto. Reelmente no se deke estava ensima de la meza. Era una foto ke fue tomada dospues de la seremoniya de bendision del Hahambashi Aseo.
Ke diferensia. Entre los 17 siviles ke se topa en la foto todos kon vistidos pretos, todos kon chapeos fotr, mizmo syertos kon chilendros. Reelmente muy elegante. 64 anyos dospues en la seremoniya avia munchas personas mizmo sin kravata. Era una seremoniya bastante elegante ma no komo 64 anyos antes. Kuando topi la fotografia pensi ken me puede aklarar i embiyi la foto a Naim Güleryüz. Dainda el es el ke puede konoser lo mas muncho de las personas ke se topan en esta foto. I puede ser Rıfat Saban. Eskriviendo esto pensando ke los hahames i hazanes ayedados pueden konoser a los hahames i hazanes ke se topan en esta fotografia. No se si tenemos otras fotografias sovre esta seremonia. Kero rengrasiar Naim Güleryüz por su ayudo.
Ya savesh ke el momento el mas emportante de esta seremoniya es kuando el Hahambashi es koronado kon la kolona de los diez komandamyentos. Tenemos en el Muzeo Djudio una reproduksion de esta kolona ekspozada en una vitrina. En el 1960 dospues de la revolusion militar, komo los dirijentes del payiz no tenian bastantes paras organizaron una kampanya para ke la djente agan donasyones de sus kozas presiozas. I la mas grande partida dyeron sus aliansas i tomaron un resivo i dos aliansas de teneke. Me akodro ke en muestra kaza avia en un kashon dos aliansas de teneke. Me disheron ke arekojeron mas de 6 kamyones de aliansas. Kualo afito dospues? Los Dirijentes de la Komunitad Djudia dyo karar kon el Gran Rabino Saban de dar su kolana al governo para ayudarlos. I savemos ke lo dyo. Ay munchas kestiones? Ande esta el resivo ke fue dada a todos los donos? Dirityeron o no este pedaso de oro? Ya savemos ke el Hahambashi Saban dyo la kolana unas kuantas semanas antes de su muerte. I komo izyeron la mueva kolana antes o dospues? Kualo es la istoria de la vyeja kolana? Se topa una otro en el mundo entero? Kualo visten los otros Gran Rabinos? Munchas kestiones ke devemos de topar una repuesta.
Este anyo la fiesta de Hanuka va empesar el 14 de desembre. Ay una organizasion de muzika ke fue organizada por el Talmud Tora. Ediz Bahar i Eran Shoef van a ser los solistos. Kon la orkestra Grup Mozaik.
Riket i Meyir Yohay estan dirijando un koro de las kriaturas de la Talmud Tora. Vos auguro una buen fiesta de Hanuka.
