Kuıando fue elijido por el Konklav - Konsilyo de los Kardinales - el Kardinal Robert Francis Prevost, primer Kardinal de los Estados Unidos eskojo el nombre Leo komo nombre de Papa i fue nomado el Papa Leo 14. Antes de las eleksyones no era mizmo un kandidato emportante entre los kardinales i es por la primera vez ke vide ke un Papa fue elijido tan presto. Devo de konfesar ke en primero pensi ke este karar fue dado kon la influensa del Prezidente Trump. Ma kreo ke no era djusto. Porke kon lo ke meldi, me ambezi ke no pensan de la mizma manera. El Papa Leo es sosyalisto i el Prezidente Trump no. El Papa Leo pensa ke kale protejar una partida de los refujiados de diferentes payizes. Devemos de saver ke el Papa nasyo en los Estados Unidos ma su famiya es orijinaria de Italia i Fransia. Vemos ke el Papa es mas objektivo en el problem del Medio Oriente; Trump pensa komo un Israelyano.
6 mezes dospues ke fue elijido, el Papa dyo karar de vijitar en primero la Turkiya i dospues el Libanon. Kreo ke dyo karar por la Turkiya porke oy en diya un diyalogo entre los payizes Kristianos i Muzulmanos tyene una grande emportansa. Ya savemos ke la gerra entre la Rusia i la Ukraina o la gerra entre Israel i los Palestinianos no es una gerra entre Kristianos i Muzulmanes; ma una pas entre estos puevlos es muy emportante para la umanidad. Ya savemos ke ay 2 milyardas de muzulmanos, i una milyarda i medya de Kristianos Katolikos en el mundo i la populasion de los Kristianos es serka de 2 milyardas i 200 milyones.
En esta vijita, el Papa Leo en primero vijito la kapitala Ankara, empesando del mosoleum de Atatürk- Anıtkabir; tuvo entrevistas kon el Prezidente de la Republika, Erdoğan, el prezidente de los echos relijiosos. Dospues ke vino a Estanbol organizo una orasion vyernes la demanyana. I vyernes se fue a Iznik. Ya se save ke en la epoka del Konsilio de İznik no aviya dainda sektas en el Kristianizmo. Es por esta razon ke rogaron endjuntos kon el Patrik Bartalomeos de Fener en İznik, en el bodre del lago ande se topava la Bazilika Antigua del Santo Neophytos. Oy en diya se topa la kavakadura arkeolojika. Kon esta seremonia los dos ombres enforsaron las relasyones entre las dos sektas del Kristianizmo.
Diya de Shabat, el evenimyento el mas emportante era la orasion ke realizo en una sala de konsyerto kon kuatro mil Kristianos. Syenes de personas vinyeron a muestro payiz para pueder ver el Papa. Personas ke biven en la Amerika Latina no tyenen munchas posibilidades para ver el Papa Katoliko. Aviya munchos Katolikos ke vinyeron de la Afrika i de los payizes de la Asia.
El Papa Leo 14 izo todo lo ke puedia i vijito el Patrik Ortodokso, Bartalomeos, i vijito la sola iglesia Asireena en Estanbol, i una iglesia Armenia. Reelmente estava yeno de enerjia.
Es oy ke me ambezi ke resivio muestro Hahambashi, Rav David Sevi i los Prezidentes de muestra komunidad en la Reprezentasion del Vatikan.
