Oy noche de lunes meldando mi whatsapp vide ke la seremoniya organizada para el Gran Rabino Sevi fue remetido un diya al 26 de Novembre, diya de mierkoles. Estash pensando munchas kozas. Deke esta seremoniya fue remetida? La razon es muy simple. Porke en Taksim las mujeres de muestro payiz estan organizando una demonstrasyon kontra las matansinas kontra las mujeres en muestro payiz. Kada anyo mas de 300 mujeres son matadas la mas grande partida por sus vyejos amantes, espozos o maridos. Ke amor!!! I va ser imposivle de pueder ir al Neve Şalom.
Noche de mierkoles vamos a partisipar a la seremoniya ke se va organizar para el kuatren Hahambashi de la Republika Turka. Los dos primeros Gran Rabinos no fueron nomados Hahambashi. Es dospues, en la epoka del Partido Demokrato ke el ministro Rav Rafael Saban fue nomado Hahambashi en 1952. Dospues de su muerte en el 1960, es el rav David Asseo ke fue elijido; i ke sirvio la Komunidad Djudia asta su muerte en el 2002. I es el mizmo anyo ke el Rav İsak Haleva fue elijido para 7 anyos kon el muevo reglamento. I el fue elijido 2 vezes mas. Los dirijentes de la komunidad, vyendo su estado de salud demandaron al Ministeryo Interior de azer 6 mezes dospues las eleksyones para elijir el Hahambashi de muestra Komunidad i de muestro payiz. Ma malorozamente el Rav Haleva mos desho la buena vida.
I es el Rav Sevi ke fue elijido dospues ke fue nomado interim Hahambashi. Le oguramos una buena reushidad en su posto.
Ke afita en el Medio Oriente? Israel esta dainda atakando el Lebanon. Ay munchos teroristos ke son dainda aktivos en este payiz. I no keren dar fin a la gerra o a las gerras. De la otra vanda Israel dainda esta echando bombas a Gaza kuando esta viendo syertos teroristos en estas tierras. No se si Israel tyene razon o no, ma esta gerra no va topar fin muy kolay.
Bivir i ver.
