Es diya de alhad ke realizaron en la sinagoga de Yanbol en Balat una ekspozision ke devia de ser un evenimyento paralel al Bienal d’Estanbol. Es muestro amigo el arkitekto, Hayim Beraha ke organizo este diya. La guerta de la sinagoga estava yena de djente. Diya de alhad mas de 200 personas vijitaron la sinagoga de Yanbol, i la ekspozision i las konferensias. En primero vos kero dizir ke devesh de vijitar esta sinagoga i su guerta. Ya savesh ke se formo una kamareta de rekuerdos djusto en frente de la sinagoga. Ke se topa en esta kamareta? Los objektos de las sinagogas de Balat ke no fonksyonan mas. Munchos rimonimes,
syertos parohetes, un alay de mapas… A lo manko en muestro payiz no kreo ke egzista un otro barrio tan riko. Hasköy i Balat eran los dos kuartieres ande bivian la mas grande partida de los Djudios d’Estanbol.
Kada uno de estos kuartieres posedavan mas de 25 sinagogas. Chikas o grandes eran la rikeza de la Djuderia de muestra sivdad. Es dospues ke empesimos a serrar estas sinagogas kuando no aviya mas bastantes Djudios para las orasiones. I malorozamente no fue muy fasil de mantener estos edifisios. I en los dos kuartieres vimos lo ke esta afitando a estas vyejas sinagogas.
Reelmente unas kuantas de estas sinagogas son una maraviya. Ma tenemos de menester de un grande fondo para pueder restorar estas todas sinagogas. I kualo las vamos azer dospues… Tenemos bastantes sinagogas para las orasyones. I kreo ke no ay bastantes Djudios ke se van kada Shabat a las sinagogas. Por egzemplo si reushimos a tomar atras el kal de Kasturiya, kreo ke dospues ke va ser restorado, no se komo, puedeser una sala de konsyertos no solo para muestra komunitad, ma para Estanbol. Kada semana se puede organizar konsertos de muzika klasika; mizmo puede ser una sala de konsertos para muestra sivdad… Se puede azer syertos museos i se pueden alkilar a syertos koleksyonarios emportantes.
Diya de alhad pudimos aklararmos sovre la istoria del kuartier de Balat i sovre los Djudios Romaniotes. El sinyor Ulaş Töre Sivrioğlu ke lavorava en la Universidad de Bandırma mos dyo syertas enformasiones sovre los Djudios del Imperio Bizantino. Mos ekspliko ke se asimilaron kon los Gregos de esta sivdad. Mizmo izyeron sus orasiones en Grego; empleavan nombres Gregos. Oy en diya dainda se topa en Estanbol entre los Djudios syertas famiyas ke son de orijin Romanyot mizmo si no lo saven. La ayudante Profesora Nisa Semiz de la Universidad Abdullah Gül, mos aklaro sovre el kuartier de Balat i su istoria. Reelmente en muestro payiz tenemos syertos akademisyanos ke se enteresan en sujetos ke mos enteresa.
Kero rengrasyar al arkitekto Hayim Beraha i a los ke se okuparon para realizar este diya en la sinagoga de Yanbol ande mas de 200 personas vijitaron i partisiparon a estas konferensias. Espero ke Yanbol va kontinuar sus aktividades kulturalas.
