Ay una semana ke la situasion esta mas kalmo en el Medio Oriente. El problem de los kadavros kontinua a ser un problem. Ma los Palestinianos o los militanes del Hamas estan lavorando kon los Ejipsianos i los ke lavoran por la Kruz Kolorada para pueder topar todos los kadavros. Kreo ke kedo solo kuatro o sinko kadavros ke no fueron topados i ke no fueron dainda dados atras a los Israelyanos. Kreo ke es djusto ke los kadavros no estavan en las manos de los Militanes del Hamas. Porke estan bivyendo un alay de problemes. Trump troko de idea i no kere mas la Riviera Palestiniana. Penso de la mizma manera. Se deve de fraguar Gaza de muevo. I no pueden ekspulsar esta populasion.Van a morar en apartamentos mas modernos i la rejion va ser kontrolada. Anyos antes en la epoka de Arafat los embiyaron a la Afrika del Norte. Ma no troka nada. Tornan mas aguzados. Kreo ke todos pensan ke esta PAS deve de turar.
Por los Amerikanos el Presidente Trump vido ke no es muy fasil de kombatir kon la China. Kreo ke tyenen mas muncha pasensia ke el presidente Trump, i ke son mas fuertes en munchos kampos. Komo en muestro payiz syen miles de personas estan embiyando paras kon kartas de bankas para merkar todo modo de kozas de la China. Komo esta muy barato, esto kree un problem emportante en el komersio de los payizes. Oy en la television franseza estavan amostrando ke estavan avriendo los paketos ke vyenen de la China. Oy se topava en el aeroporto 200.000 paketos ke estavan viniendo de la China. Tenemos el mizmo problem en muestro payiz; en Turkiya. La djente estan merkando kada diya un alay de kozas. Los payizes deven de tomar una duana sovre la valor de los objektos. En Paris mismo avrieron un magazen ke vende estos objektos; i los otros magazenes no estan kontentes de esta situasion.
Dyes mezes dospues vamos a ver si el Presidente Trump se va kalmar. Dospues ke un muzulmano gano el posto de prezidente de la munisipalitad de New York, el prezidente Trump fue demoralizado. Vido ke no es muy fasil komo lo pensa. I reelmente no esto entendyendo komo el partido Demokrato elijo un afrikano para esta posto. Komo la sivdad tyene munchos problemes, es probavle ke el muevo prezidente va resolver los problemes ke bive la sivdad de New York.
