Dospues de los evenimyentos del 7 Oktobre en la frontiera Israelyana serka de la Banda de Gaza, malorozamente el anti-israelismo pujo en el mundo entero. I el antisemitizmo tomo su parte. La politika del governo israelyano kreo ke no sirvyo a amenguar el anti-israelismo. Ya savemos ke empesando de las universitas amerikanas, kanadianas i inglezas, vimos munchos movimyentos en favor de los Palestinianos.
En los Estados Unidos estos movimyentos fueron detenidos por fuersa. Son los ordenes del governo ke frenaron estas manifestasyones.
En muestro payiz, en Turkiya normalmente ay una partida de la populasion ke se komportan komo Arabos o Palestinianos; ma una partida pensan mas imparsyal/objektivos. Esta vez no fue este modo. I la mas grande parte de los sivdadinos no pensan komo el governo israelyano. I estan avlando mal porke estan vyendo ke syen miles de Palestinianos estan en la mizerya. Mizmo dospues de la PAS, kontinuaron a echar bombas a los Palestinianos ke no tyenen ni un tejado para abrigarsen.
Deke vos esto kontando todo esto? Porke esta situasion esta influensando la populasion ke vijita muestro Muzeo Djudio de Turkiya. Durante este tyempo solo unos kuantos diyas no avrimos el Muzeo. Si no, kada diya estavamos avyertos. Un syerto tyempo teniyamos muy pokos vijitadores. Ma dospues, la situasion se izo mas normal. Los dos mezes dalkavos resivimos un grande numero de vijitadores. No ay dinguna eksplikasion para esta situasion? Es djusto ke la grande partida de los vijitadores son estranjeros. Ma mizmo kuando organizamos o se organiza tures en Estanbol, en Balat i en Galata sovre los Djudios todos son enteresados para estas vijitas. Mizmo syertas eskolas vijitaron el muzeo en el mez de Oktobre.
Ay munchas personas i tures ke keren vijitar las sinagogas de Balat: La Sinagoga de Ahrida i la Sinagoga de Yanbol ke fue restorada serka tyempo antes. Deke este entereso? Puedeser porke se topan en el mizmo lugar ke las primeras sinagogas ke fueron fraguadas en Balat 600 anyos antes. Los dirijentes de Balat deven de organizar muy ordenado estas vijitas sin refuzar kon syertos preteksos.
