Ay mas de dos anyos ke los yahides de Balat estavan aziendo las orasiones de Shabat en la Sinagoga de Ahrida ke se topa a dos pasos de la Sinagoga de Yanbol. Estas dos Sinagogas ke se topan en Balat i son las dos dalkavo ke fueron fraguadas antes ke los Djudios Sefardim emigraron de Espanya a Estanbol. No son sinagogas Ashkenazis; no son sinagogas Sefaradis. Ma kon la grande populasion Sefaradi ke vino de Espanya i ke se enstalaron en Balat, estas dos sinagogas son achetadas komo sinagogas Sefaradis. La sinagoga teniya syertos problemes arkitektural. I es el arkitekto Hayim Beraha ke enkaveso esta restorasion. En el empesijo avrimos una kamareta ande se topava todos los artikolos relijiozos ke arekojeron de las sinagogas ke no fonksyonan mas. Anyos antes mas de 25 sinagogas chikas i grandes fonksyonavan en el kuartier de Balat. Oy en diya es solo la Sinagoga de Ahrida i la Sinagoga de Yanbol ke fonksyonan. Todos estos artikolos fueron restorados i se formo una kamareta kon un alay de objektos relijiozos.
Noche de myerkoles la seremoniya empeso kon la entrada a la Sinagoga del Hahambashi Sevi kon la Sefer Tora en los brasos. El fue segido por syertos miembros del Bet-Din. Los Raves İsak Peres, İsak Alaluf i Albert Gerşon estavan prontos en esta seremoniya. Es el prezidente Moris Levi ke dyo un diskorso. El mos konto la istoria de la sinagoga. El sinyor Levi es de una famiya orijinaria de Balat i su granpapa era un ombre importante en el kazal de Balat. Moris mos informo ke van a organizar konferensias en esta sinagoga. Muestra Komunidad tyene de menester de este modo de aktividades kulturales en syertas sinagogas. El Kal de los Frankos - de los Italianos es el primer ke empeso este modo de aktividades. Ma este anyo no vimos dainda dinguna aktivitad.
Dospues el Hahambashi Sevi mos avlo sovre la importansia del kazal de Balat. I apresio a los ke lavoraron para la restorasion de la sinagoga. Un regalo fue prezentado al Hazan Albert Güzelbahar ke sirvio los 52 anyos dalkavo en las sinagogas de Balat. Los prezidentes de diferentes fondasiones de sinagogas estavan prontos en la sinagoga para esta seremoniya.
Espero ke munchas personas de muestra komunidad i turistos van a vijitar esta sinagoga. I estas dos sinagogas van a ser muy emportantes en la vida turistika de muestra komunidad.
Kero rengrasiar el Arkitekto Hayim Beraha por su lavoro.
