Reelmente no se si los dirijentes de las dos vandas keriyan realizar esta Pas, o si esto fue realizado kon el palo del Prezidente Amerikano, Trump. Una semana dospues por los Israelianos, la mas grande ganansya fue de resivir sanos los 20 rehenes dalkavo dospues de mas de dos anyos. I no se komo, en las televisiones no paresian en un estado desgrasyado. Es inkreivle de ver estas personas sanos i rezios dospues de dos anyos. Ma el Tratado no esta kaminando. Los Palestinianos no pudyeron dar los kadavres de los 28 muertos Israelianos. Deviyan de dizir la verdad del empesijo. En el empesijo entegraron solo sinko muertes. I dospues de la reaksyon de los Israelianos syete otros. Ay dainda 16 otros. De la otra vanda Israel no esta deshando ke los kamyones de ayudo alkansen a Gazza. Reelmente todo para ke esta pas no se realize. Los Palestinianos dizen ke las kadavras se topan debasho de las ruinas, i es imposivle de toparlos sin dingun instrumento. Los Israelyanos no estan deshando ke syertos ekipos de diferentes payizes pasen a la Banda de Gazza para ayudar los Palestinianos para ke puedan topar estas kadavras. De la otra vanda los Palestinianos estan ambyertos, i una partida se van a murir si no topan bastante komida.
En las televisiones Israelianas vemos un rehen ke esta tanyendo su gitara, i otro aziendo otras kozas. Reelmente es un mirakolo de ver esto todo. Esto pensando; pasar dos anyos en un tunel, komyendo a penas. Ke desgrasia de bivir en una situasion asemejante.
Unos kuantos diyas dospues del Tratado vemos en la prensa turka i internasional haberes sovre el Turkish Airlines. Ya savemos ke antes del 7 Oktobre mas de 20 volos se realizavan kada diya de la Turkiya a Israel. En primero disheron ke kada diya solo dos volos se van a realizar empesando del mez de Novembre. Dospues disheron ke no es posivle i ke se va realisar empesando del mez de marso. No se kuando va empesar ma tenemos de menester de este volo para no ir pasando por la Gresia / Atena; o por la Giorgia /Tiflis; kon todos estos volos estash pagando dopio i piedrendo muncho tyempo. El treser itinerario es de ir por Cyprus. Del norte al sud. Reelmente no supimos la valor de los volos entre la Turkiya i Israel.
Esto terminando mi artikolo ogurando una pas entre Israel i los Palestinianos; i munchos volos direktos entre la Turkiya i Israel.
