Deviya de eskrivir noche de alhad mi artikolo para el Şalom. Dishe a Karen dame permision porke kero eskrivir amanyana dospues ke los Palestinianos van a liberar los rehenes i Israel va liberar los 1966 kondanados ke se topan en las prisiones israelyanas. Ya savemos ke no liberaron los ke estavan kupavles del 7 Oktobre. Demanyana en primero liberaron 7 de los 20 ke se topavan en las manos de los militanes del Hamas; i unas kuantas oras dospues los 13 otros. En primero estavan dizyendo ke 2 o 3 de entre eyos no estan en una buena situasion. Ma en la television no vimos un kavzo asemejante. Espero ke dos anyos dospues, todos van a estar en buena situasion. Agora van a dar los muertos, ma si los topan. Oy a la tadre disheron ke ay solo 4 muertos. No se si pyedreron los otros; o puedeser estan debasho de las ruinas. Una desgrasya. Espero ke dingunos va empesar de muevo a gerrear. Esta Paz es muy emportante para los Israelyanos, para los Palestinianos ke biven en Gaza i para los Palestinianos ke biven en la banda de Sheria. Mizmo esta paz es muy emportante para el Medio-Oriente i para la umanidad.
Oy el Prezidente Amerikano Trump verso las 10.00 vino a Israel i en la araba viniendo de Ben Gurion asta la Kneseth. Avlando kon Netanyahu le disho deke no vyenes al Sharm al Sheikh. I un problem mas. A la fin Netanyahu disho ke no va vinir porke es mued. Una partida de los lideres; ke entre eyos se topava el prezidente Erdoğen de Turkiya, disheron ke el Hamas no va tomar lugar en esta seduta i no keren ke Israel sea reprezentada. Trump avlo en la Knesset mas de una ora i alavo buen karar al primer ministro Netanyahu. Demando al prezidente de la republika, el sinyor Herzog ke no karishtreyen muncho para apenar el primer ministro Netanyahu. Agora no es la sira de esto. En la Knesset, Trump i Netanyahu fueron aplodizados munchas vezes. Es djusto ke una partida no aplodizaron el primer ministro Netanyahu.
Es a las 17.30, 3 oras mas tadre de la ora programada ke alkanso a la seduta en Sharm al Sheikh. I dos oras dospues ke alkanso a esta sivdad ande la seduta de los kapos esta empesando. Si reelmente va ser muy enteresante, vos va kontar todo la semana ke viene.
Esto muy kontente por los 20 rehenes ke tornaron a kaza. I por sus famiyas.
