Anyada buena a todos. Lunes la noche de muevo mos arekojimos al dorredor de la meza para el empesijo del muevo anyo 5786. Mi ijo ke los kuatro anyos dalkavo estava en Toronto en Kanada kuando estavamos fiestando la anyada mueva, dospues ke eskapo la Universitad de Toronto, este anyo mos disho ke kere estar kon mozotros en Estanbol para fiestar la anyada mueva. Es este modo ke los Djudios kontinuan a ser Djudios. Kon la ley, kon las tradisyones… Mi mujer i yo estamos muy kontentes porke estamos fiestando la fiesta de Rosh Ashana toda la famiya endjuntos.
Dos semanas antes kon la konferensia ke prezenti en la Universitad Bilgi sovre “Sefaradis”, meldi munchas kozas sovre la populasion Sefaradi en el mundo. En primero devemos de deskrivir ken forma la populasion Sefaradi. En ebreo Sefarad sinyifika la peninsula Iberika, los Djudios ke vinieron de Espanya dospues de la ekspulsion en 1492 i del Portugal 5 anyos dospues. Ande se fueron estos Djudios Sefardim. Si tenesh la posibilitad de vijitar el Muzeo Djudio d’Estanbol, en el primer etaj tenesh el mazal de ver esta emigrasion ensima de una karta geografika. Desparte de los Sefardim entre los Djudios se topa una grande populasion ke los nomamos Mizrahi, los Djudios del Este. Ya savemos ke el Primer Templo en Yerushalayim fue fraguado en el anyo 957 antes del Kristo; i fue derrokado por el rey de los Babilones, Nabukadnesar II en 586 antes del Kristo. I dospues los Djudios fueron egzilados a Babilon. I se kedaron aya 70 anyos. El egzilo de Babilon no fue una desgrasia para los Djudios. Es aya ke eskrivyeron el Talmud de Babilon. I 70 anyos dospues tornando a Yerushalayim una partida no fueron a Yerushalayim i se enstalaron en el sud de la Anatolia, en las montanyas ke se topan entre el Azerbaydjan i el İran. Estos todos Djudios fueron nomados “Mizrahi, los Djudios del Este”. Nunka estos Djudios fueron nomados kon los Ashkenazes. I es por esta razon ke los Djudios Sefardi kon los Mizrahis son una populasion de serka de 4 milyones.
Kuando los Espanyoles i los Portugezes dyeron karar de dar atras la nasyonalidad Espanyola o Portugeza era prezidente de la komunidad Djudia de Turkiya i dishe en los dokumentos “Djudios ke pratikan la ley kon las tradisiones sefaradis por un sinyor o sinyora ke era nasido de un padre i de una madre Mizrahi. Sin dinguna mintira los Espanyoles i los Portugezes achetaron estas eksplikasiones.
Dospues de la fondasion de Israel la mas grande partida de los dirijentes del payiz eran los Ashkenazis. I malorozamente estavan desdenyando los sefardim ke vinyeron de los payizes arabos, del norte de la Afrika – del Maroco; de la Algeria; de la Tunisia; de la Libia; de los payizes komo el Yemen… Reelmente una grande partida eran personas inyorentes. Ma oy en diya vemos ke la mas grande partida de los Djudios en Israel son Sefardim i son eyos ke dirijan el payiz - bueno o negro!! – En Fransia se topa 350.000 sefardim entre los 450.000 Djudios. En los Estados Unidos solo 400.000 Sefardim entre los 6 miliones de Djudios. En la Argentina se topa 180.000 Djudios i solo 50.000 Sefardim.
Para konkluir el sujeto puedemos dizir ke oy en diya se topa serka de 4 milyones de Sefardim entre los 15,5-16 milyones de Djudios ke se topan en el mundo.
