Este mez Karen me dyo una noche de vakansa i no eskrivi al Amaneser. Diya de alhad teniya una konferensia sovre los “Sefaradis”. Organizaron una konferensia de dos diyas, i el nombre era “Sohbet”; Shabat i alhad avia 4 konferensias kada diya. Diya de alhad tenia una konferensia. Laki Vingas de la Komunidad de los gregos avlo sovre el Orfelinato de Büyükada i su restorasion. El mas grande edifisio de tavla ke egziste en la Evropa. Malorozamente dospues de los anyos 70 ke su fonksyon fue kedada, el edifisio troko de patron i es la Direksion de las fondasiones ke fue el muevo patron sin gastar ni un grosh. Yo fui el segundo avlador. Dospues es un Ermeni del Kapalıçarşı ke tomo la palavra para darmos a entender lo ke es un ofisyal "zanaatkar". I konto su vida i todo su lavoro. Kreo ke es un ombre muy yugozo. Mos konto todo lo ke izo en su vida i komo ayudo los mansevos i las mujeres para ke se ambezen este lavoro. El es un maestro de las monturas de djoyas. El ke avlo dalkavo era Mois Gabay, muestro amigo ke lavoramos endjuntos en el Muzeo Djudio. Mois se inyervo muncho, porke avia muy poka djente. Reelmente teniya razon. Porke no es muy fasil para mozotros de dar konferensias para 10 o kinze personas. No vale la pena de dezrepozarse para 10 o kinze almas. Es djusto ke no tomamos ni paras para esto. Ma es muy emportante lo ke mos ambezamos kuando estamos aparejando una konferensia asemejante. Empesi dizyendo kualo sinyifika el biervo “Sefarad". Es Espanya i Portugal - la Peninsula Iberika (la Espanya i el Portugal) en Ebreo. Los dos payizes de los kuales los Djudios fueron echados 533 i 538 anyos antes. Es el Imperio Otomano komo su sultan Bayezit II ke resivyeron estos djudios savios. I el Sultan disho ke el rey Espanyol enprovesio su payiz i enrikesyo el suyo.
Kualo es la populasion Sefaradi en el mundo? Ya savemos ke el solo sekto ke egziste en el Djudaismo es el Karaizmo ke no acheta el Talmud ni los Hahames. Es por esto ke los hahames no los achetan komo Djudios. I los 30.000 Karayes son el solo sekto entre los Djudios. Kontando los Sefaradis avli sovre la muzika azyendo oyer serka de 15 kantikas. Es İzzet ke me aparejo estas kantikas ke le demandi. Unos kuantos kantes de muzika klasika turka. Kantes ke fueron kompozadas por hazanes Djudios. Unos kantes de los hazanes sefaradis komo Hayim Efendi, İsak Algazi i el famozo İsak Maçoro. Reelmente estos kantes influenso todos los ke estavan en la sala. Dospues sintyeron kantes ke se kantan en las sinagogas i les plazyo muncho. Eskapi la muzika sefaradi kon los kantes sefaradis de orijin de Oksidente i de Oriente. Syertas kantikas son influensadas de la muzika espanyola, i syertas kantikas enfluensadas de la muzika turka.
Prezenti munchas komidas de los boyos i borekas asta las gayas kon avramila; i de las kashkarikas asta el armiko. Konti sovre el meoyo, las molejas, el mundaregis i el ligado. Oy en diya dizen ke no se deve de komer las tripas (sakatat) ma la kozina Djudia Sefaradi tyene munchas rikezas sovre este modo de komidas. Avli muncho mas sovre muestras komidas i eskapi dizyendo ke estamos muy kontentes de komer estas komidas mizmo oy en diya.
Eskapi mi avla avlando sovre muestro Djudezmo i su vida oy en diya. Avli ke esta lingua teniya sus funerayes en los 70. Ma no fue este modo. La lingua topo grande apoyo kon las kantikas, los teatros ke fueron realizados, kon los livros ke fueron publikados. El Şalom los 50 anyos dalkavo publiko miles i miles de artikolos en esta lingua. Puedeser vash a ver la muerte de esta lingua ma no kuando estamos en vida.
