Es esta fin de semana ke vimos en la ada un syerto nombre de famiyas ke tornaron a la sivdad. Una parte de las eskolas empesan sus ensenyamiento amanyana (Lunes), i la majorita de las eskolas el 8 del mez de septembre. Los paryentes de estas kreaturas diya de alhad kon las validjas en la mano tornaron a Estanbol: syertos se van a ir amanyana a la eskola i syertos la semana ke vyene. Ke no vos pareska ke estas ijikas o estos ijikos estavan en kaza todos estos mezes de enverano. Kada uno komo una flama pasaron dos o tres mezes en las izlas i kreo ke se arepozaron bastante. Es noche de shabat ke en muestro apartamento dospues de las dodje tuvimos un problem kon los mansevos ke biven en el bloko de kazas (site). Kuando tornimos a kaza a las dodje de la noche, estavan aziendo un bruido terible; i mi mujer les disho un alay de kozas i no la sintyeron. Komo eya es profesional i lavora kon las kriaturas, no pudo dijerar lo ke le dizyeron i reelmente se inyervo. Oy en diya reelmente es muy difisil de tener dar i aver kon las kriaturas. Kada diya se esta dando una otra letra a la mueva jenerasion. X, Y Z eran las jenerasiones dalkavo. Ma kreo ke esta vez kada tres anyos van a krear una mueva jenerasion. Reelmente muy difisil para mozotros i muy difisil para los profesioneles ke lavoran kon estas kriaturas. Mi mujer lavora kon estas kriaturas i las kriaturas deven de tener una otra makula… Reelmente un lavoro muy difisil. El Dyo ke le de pasensya…
El 30 del mez de Agosto reelmente es muy emportante por las izlas i para los mansevos ke se topan en las izlas. Todas las kriaturas ke lavoraron aziendo spor son rekompensados por los dirijentes de los klubes. I todos los mansevos son muy kontentes de resivir esta medalya.
Kualo se pasa en el Mdio-Oriente? Netanyahu dyo karar de no dar repozo a los palestinianos. Puede ser tyene rason? Ma todo el mundo esta kontra los Israelianos, mizmo kontra los Djudios. I no ay repozo por esta djente. Los Israelianos ke vijitan munchos payizes no estan puediendo avlar en ebreo. Porke reelmente ay una grande antipatiya kontra este puevlo. No se si son reelmentte kulpavles?... No se si estas gerras se van a terminar. Porke munchos Djudios i Israelianos mizmo si no tyenen la mizma idea estan disturbados por la djente kon ken estan entornados.
