Antes el Estado Djudio, munchos filantropes djudios dyeron esforsos a edukar los djudios para ke se ambezen komo se pueden azer agrikultores. Es el Baron Hirsch ke lavoro muncho para ke los djudios de Rusia i de Polonya se ambezen este ofisio, i para ke tengan un echo kuando se ivan a instalar en las Tierras Santas.
El muzeo djudio esta realizando un proyekto kon la istoryana la Doktora Siren Bora para realizar un livro sovre las granjas ke fueron kreadas en las tierras Otomanas i Turkas. Reelmente una epoka problematika. Durante la Gerra de los Balkanes i la Primera Gerra Mondial, los Otomanos tenian munchos problemes importantes.
En la Trakya, en Estanbol, serka de İzmir, en Eskişehir mizmo en las sivdades del sud oriente fondaron mas de katorze granjas.
Es esta semana ke avli kon muestro amigo, Anri Niyego, marido de muestra amiga, Dora Niyego ke es el esktivano del livro sovre Haydarpaşa.
Kuando eskrivyeron este livro tuvyeron la posibilidad de avlar kon las personas aedadas, ke konosian el çiftlik “Messila Hadacha” ke fue fondado en Sultanbeyli. No savemos lo ke afito a la fin. No savemos mizmo si reusheron a vender este kampo. Es un terreno de unos kuantos miliones metros kuadrados. Ay munchas konsejas sovre este chiftlik. Mizmo la munisipalidad de Sultanbeyli, ande esta kontando la istoria de este kuartier, en el livro esta dando lugar a este chiftlik ke fue fondado por el Jewish Collonization Association.
Muestro amigo, Anti Niyego eskrivio un manuskrito sovre este sujeto. Fue komo una teza. Una teza de 240 ojas. Lo kero felisitar. Kreo ke este livro va ayudar la Doktoresa Bora a lo manko kon sus bibliografias.
Bivir i ver.
