La mas grande partida de los ombres i mujeres preferan el enverano porke tyenen mas manko dertes ke en invyerno. En invyerno el mas grande dert es de kayntar la kaza. I oy en diya es bastante karo. La semana pasada vyernes i shabat en la Ada aviya un ayre desgrasyado. Mismo no fue posivle de kedar en la plaj.
Empesando del diya de alhad el tyempo esta mas normal. Mi ijo ke no es un mansevo muy sportivo, diya de shabat en djugando un match de basketbol tuvo un problem bastante emportante kon su pye. Vamos a ver la hohenta ke mos va kitar el Doktor.
En enverano tenemos mas munchas posibilidades para azer todo modo de spor.
No kero avlar muncho de politika porke no me esta gustando lo ke estan azyendo. Trump organizo una seduta kon Putin en Alaska, i dyo karar ke es el ke deve de dar karar por la Ukrayna. Kreo ke no es djusto. Los payizes Evropeos ke son mas demokratikos dyeron apoyo a Zelensky, prezidente de este payiz. I los Evropeos estan dando apoyo a este payiz.
Israel dyo karar ke va tomar Gazza entera i va formar un muevo payiz. Vamos a ver los Palestinianos en diferentes sivdades de la Afrika.
No kreo ke no van a ser kontentes. Es muy difisil de bivir en un otro payiz ma mizmo Trump esta dando apoyo a esta idea. I vamos a ver en unos kuantos anyos, Netanyahu i Trump en la Riviera de Gazza. No so rasisto, ma no me esta plazyendo esta situasion.
La semana pasada bivimos mizmo en Estanbol, un rash. Estamos viendo ke este akto no esta topando fin. Ma mos ambezimos ke devemos de fraguar buenos batimyentos para salvarmos de esta desgrasia. El Chili es el mijor egzempio. Dospues de un rash bastante emportante reusheron a renovar todas las kazas i los batimyentos. Reelmente no se en ke periodo de tyempo!
Kero eskapar mi artikolo de esta semana rogando al Dyo ke mos de pas en todas las partes del mundo.
