Es las dos semanas dalkavo bivimos todo modo de kalores. No es muy normal de ver los termometros a los 35 o 40 grados. Estava muy difisil de tomar reflo. Anyos i anyos tuvimos enveranos ande mizmo en los diarios avia fotografias de un guevo ke se rompio en el ponte de Galata i el guevo se kozyo en poko tyempo ensima de la kaye. No me olvido de este evenimyento i de esta foto en los diarios.
Kada semana esto en la ada solo los diyas de shabat i de alhad. Ma esta semana kon esta kalor me esto kedando mizmo la noche de alhad.
Ke trokamyento en el Medio Oriente. El primer ministro Israelyano Netanyahu kon sus ministros dyo karar de ir asta la fin de Gaza i de derokar todo. No se lo ke va azer kon los un milyon i medio o dos milyones de Palestinianos. Los va mandar al sud de Gaza? Es reelmente una desgrasya. Kualo va azer dospues? No se si va ser la fin de los militanes del Hamas. Bivir i ver.
El prezidente Trump esta dainda kon su Show. Esta semana estava kon los prezidentes del Azarbeidjan i de la Armenia. I dospues de dos oras estava muy kontente de ver ke realizo lo ke pensava. No se lo ke pensava, ma en todas las medias topo lugar este enkontro. Trump esta aziendo todo lo ke puede para ser aktivo en todas las medias. Por el Medio Oriente Trump disho ke Gaza es el karar del Estado Israelyano. I esto esta dando koraje al primer ministro Netanyahu.
Vamos a ver munchas kozas en los diyas ke vyenen.
En muestro payiz vemos ke ay chetas ke organizan diplomas falsas. Todo modo de diplomas. I no esto kontente de ver esta situasion. Se avla ke ay mizmo akademisyenes en las universitas ke dan lesyones kon diplomas falsas. Reelmente una desgrasia!
