Mirando lo ke se pasa en Turkiya, en el Medio-Oriente i en los Estados Unidos lo mas emportante trokamyento fue en los Estados Unidos. El prezidente Trump se fue al viejo kontinente para azer pazarlik kon los Estados Evropeos, i dyeron karar lo ke deven de aplikar a los produktos evropeos. I sin pelearsen dyeron karar a 15% de taksa. Agora todos estan kontentes, ma esto todo no kreo ke va ser la razon para ke los Amerikanos merken todo mas barato. Kon estas taksas kreo ke van a tener una enflasion. El prezidente Trump esta kontinuando a tratar kon todos los payizes. Reelmente no se kuando se va eskapar.
En el Medio-Oriente dingun trokamyento. En Gaza los Palestinianos estan reelmente en una situasion no muy famoza. Kada diya un alay de djente se estan muryendo de ambre. Ya pueden azer la gerra ma mi opinion es ke dinguna persona deve murir de ambre porke no les estan dando bastante agua ni komida. Estamos viendo en un filmo ke un rehen israelyano esta en una negra situasion i se va murir en unos kuantos diyas. Reelmente kalia azer Pas para salvar estas personas ke estan kaji dos anyos en Gaza. En el mez de Septembre en la Reunion de los Payizes Unidos kreo ke vamos a ver trokamyentos muy emportantes. Empesando de la Inglatiera i la Fransia munchos payizes Evropeos se estan aparejando a achetar la egzistensya de un payiz Palestiniano. Reelmente es por la primera vez ke syertos payizes evropeos pensan de esta manera. Ma estas desisiones no estan trokando el komporto del primer ministro Israelyano Netanyahu.
I en muestro payiz tenemos bastantes problemes en la politika ma no es muy fasil de trokar lo ke estamos bivyendo. Ay munchos pazarlikes entre el govyerno i los Kurdes. No savemos mizmo ken es el ke reprezenta los Kurdes. El partido DEM o el ke se topa en la Izla Imralı o Selahattin Demirtaş, el vyejo prezidente del partido ke se topa en la prizion los mueve anyos dalkavo. Esperamos ke esto todo se realize en poko tyempo i ke la ekonomia Turka se endereche. Vamos a ver todos estos trokamyentos.
