Ya savemos ke es enverano, i ke ay mas muncha kalor ke las otras sezones. Ma este anyo no esta de rezistir. Komo no tuvimos bastante inyeve ni luvya este invyerno, los arvoles estan sekos i esta muy fasil de ver fuegos mizmo en las rejiones komo Bursa o la Mar Preta ande no semos uzados de ver fuegos. Ma este anyo esta una desgrasia. No solo en Turkiya ma en todos los payizes de la rejion de la Mediteranea. Es djusto ke la umanidad tyene de menester de los fuegos en las sharas. Ma no tanto. Malorozamente las semanas dalkavo los 95 por syen de los fuegos fueron realizados por kulpa de las personas. I mas de 150 personas fueron apanyados i djuzgados. Otruna semana tenemos una kalor ke no puedemos rezistir. I dospues esperamos un enverano komo konosemos.
Es esta semana ke fue publikado en inglez (segunda edision) del livro de las komidas sefardis de İzmir. Kero rengrasyar los autores del livro i los ke tomaron parte para ke este livro sea publikado.
Es en unos kuantos diyas ke el livro preparado por muestro amigo, Rubi Asa va ser publikado: "Las trasas de los Djudios en Estanbol”. Un livro yeno de fotografias eskrito en dos linguas: en turko i en inglez. Mos ambezimos ke este modo de livros deven de ser publikados en dos linguas: en turko i en inglez. En el livro vamos a topar fotografias i eksplikasyones istorikas i aktuales de los kuartieres de Estanbol ande moravan los Djudios komo Balat, Hasköy, Haydarpaşa, Kuzguncuk, Galata i la Kula, Sirkeci i las Adas… Reelmente oy es muy enteresante de vijitar estos kuartieres.
Ay un otro livro ke keremos publikar ma no vos va dizir el nombre porke ay sesh mezes ke esta en publikasyon ma no reushi a publikarlo por diferentes razones. Kreo ke va alkansar fina la fin del mez de agosto.
Oy mizmo el artisto de fotografias va realizar una ekspozision en “Maslak 42” en el 5en etaj. En una kreo mueva galeria de arte. Va ser una ekspozision retrospektiva del artisto de fotografias, İzzet Keribar.
Va ser en el 29 de este mez.
