No se si savesh; la Sinagoga de Yanbol fue fraguada por la primera vez, antes ke los Sefardim de Espanya vengan al Imperio Otomano. Esta Sinagoga fue fraguada por los Djudios de Yanbol, sivdad de Bulgaria. En la istoria de los Djudios del Imperio Otomano vemos en primero ke los Djudios de Makedonia abondonaron estas sivdades para vinir al Imperio Otomano ande toparon mas muncha libertad para bivir i para pratikar sus relijion. Ahrida, Kasturiya son las mas famozas i son fraguadas por los Djudios ke vinieron de Makedonia.
Ya savemos ke un tyempo el Patrik Grego fue enforkado delantre de la puerta del lugar ande se topa el Patrik Grego por el Vizir. I dospues ke fue enforkado yamo a tres Djudios para ke lo echen a la mar. Kualo fue el rezultado: miles i miles de Djudios fueron matados por vengansa en Makedonia. Kreo ke es una rejion muy danjoroza para los Djudios. No se si savesh esta puerta de la Patrikane no se avre dainda. En el muzeo tenemos un parohet ke fue dado por la Sinyora Ruty Ergas ke bive en Miami. Su famiya era una de las dalkavos famiyas ke abandonaron una chika sivdad en Makedonia para vinir al Imperio Otomano, i la sinagoga dyo atras a la bis bis nona de Ruth este parohet. I eya reusho a konservarlo i dospues me lo embiyo de Miami. Oy en diya este parohet esta en el Muzeo Djudio i esta eksposado kon esta toda eksplikasion.
La semana pasada en la Sinagoga de Yanbol avia una seremonia para rengrasiar los Alemanes ke mos ayudaron materyalmente para formar una ekspozision muy emportante en la Sinagoga de Yanbol. Es el Arkitekto Hayim Beraha ke lavoro para protejar i para kitar en medio todas las rikezas de esta sinagoga. Reelmente izo una ovra maestra. Kale ver antes de dar karar. Kreo ke la Sinagoga de Yanbol fue restorada por la primera vez de esta manera. Oy en diya en su guerta ande mas de 70 personas pueden topar lugar para un desayuno o una komida. Ay un lugar ande se puede dar konferensias. I organizaron un salon ande estan ekspozando munchos trezoros. Es el muzeo Djudio kon el apoyo del Konsulato Aleman ke mos dyo apoyo materyalmente ke restorimos mas de 50 objektos. I la mas grande partida son ekspozados en esta sala. Kreo ke empesando de este otonyo todo modo de turistos turkos o estranjeros van a vinir a vijitar esta sinagoga i va ser un lugar muy emportante para el turizmo Djudaiko de Estanbol.
